Бугун Тошкент вақти билан 18:15дан бошлаб Ўзбекистон Олимпия терма жамоаси учун муҳим учрашув старт олади. Дарҳақиқат, биз гуруҳ босқичидаги ўйинларимиз билан ҳеч кимни ҳайратда қолдирмадик. Хатто футболчиларимиз ҳам ўз ўйинларидан қониқиш ҳосил қилишмади десак ҳам бўлади. Шунга қарамай, плей-оффга чиққан жамоаларнинг имкониятлари доиммо тенг бўлади. Шундай экан, олимпиячиларимиз ҳали ҳеч нарсани бой беришгани йўқ!
Улар асосий курашга энди киришмоқда. Тўғрироғи бугун киришади. Шу ўринда айтиб ўтиш жоиз-ки, йигитларимизнинг ҳаётида тубдан ўзгариш ясашга қодир иккита ўйин уларни олдинда кутиб турибди. Олимпиячиларимизнинг ушбу мусобақаги зафарли юриш биз учун ҳам жуда муҳим.
Сабаби, Токио чипталари қўлга киритилса, биз ўз кучига ишонган, катта даврларни кўрган, муҳим ўйинларда оёғи қалтираб қолмайдинганлардан ташкил топган янги авлод футболчиларига эга бўламиз. Футболимиздаги руҳият билан боғлиқ абадий муаммоларимиз балки ушбу мусобақада орқали бир фурсат чекинишга мажбур бўлар?! Истаймизми, йўқми шу йигитлари ўзбек футболининг эртаси. Биз қанчалар танқид қилмайлик, шу қоракўзлар бугун юртимиз шарафини ҳимоя қилиш учун майдонга чиқишади. Ишонаман, уларни ижтимоий тармоқларда тинмай танқид қилаётганларнинг барчаси бугун чин юракдан миллатимиз футболдаги юксалиш орзусида телеэкран олдидан жой олади. Нима қилсак ҳам барибир ЎЗБEКмиз! Марра сари яна икки қадам қолди йигитлар! Биз барибир сизга ишонамиз ва қўллаб-қувватлаймиз!
