Bugun Toshkent vaqti bilan 18:15dan boshlab O‘zbekiston Olimpiya terma jamoasi uchun muhim uchrashuv start oladi. Darhaqiqat, biz guruh bosqichidagi o‘yinlarimiz bilan hech kimni hayratda qoldirmadik. Xatto futbolchilarimiz ham o‘z o‘yinlaridan qoniqish hosil qilishmadi desak ham bo‘ladi. Shunga qaramay, pley-offga chiqqan jamoalarning imkoniyatlari doimmo teng bo‘ladi. Shunday ekan, olimpiyachilarimiz hali hech narsani boy berishgani yo‘q!
Ular asosiy kurashga endi kirishmoqda. To‘g‘rirog‘i bugun kirishadi. Shu o‘rinda aytib o‘tish joiz-ki, yigitlarimizning hayotida tubdan o‘zgarish yasashga qodir ikkita o‘yin ularni oldinda kutib turibdi. Olimpiyachilarimizning ushbu musobaqagi zafarli yurish biz uchun ham juda muhim.
Sababi, Tokio chiptalari qo‘lga kiritilsa, biz o‘z kuchiga ishongan, katta davrlarni ko‘rgan, muhim o‘yinlarda oyog‘i qaltirab qolmaydinganlardan tashkil topgan yangi avlod futbolchilariga ega bo‘lamiz. Futbolimizdagi ruhiyat bilan bog‘liq abadiy muammolarimiz balki ushbu musobaqada orqali bir fursat chekinishga majbur bo‘lar?! Istaymizmi, yo‘qmi shu yigitlari o‘zbek futbolining ertasi. Biz qanchalar tanqid qilmaylik, shu qorako‘zlar bugun yurtimiz sharafini himoya qilish uchun maydonga chiqishadi. Ishonaman, ularni ijtimoiy tarmoqlarda tinmay tanqid qilayotganlarning barchasi bugun chin yurakdan millatimiz futboldagi yuksalish orzusida teleekran oldidan joy oladi. Nima qilsak ham baribir O‘ZBEKmiz! Marra sari yana ikki qadam qoldi yigitlar! Biz baribir sizga ishonamiz va qo‘llab-quvvatlaymiz!
