"Барселона" янги бош мураббийи Кике Сетьен ўзининг дебют ўйинида "Гранада"ни кичик ҳисобда мағлуб этди.

Испаниялик мутахассис Йохан Кройф ва Хосеп Гвардиоланинг мухлиси ҳисобланади. У ўзи ишлаган жамоаларда доимо "тики-така" услубини жорий қилган. "Барса" унинг дастлабки ўйинида қандай натижа қайд этганига эътиборингизни қаратамиз.

– Барселона 83% вақт давомида тўпни назорат қилди;

– Каталонияликлар жами 1005та узатмани амалга оширишди. Уларнинг 92 фоизи аниқ бўлди;

– Энг кўп узатмани Бускетс амалга оширди — 142та. Таққослаш учун: бутун бошли "Гранада" ўйин давомида бор-йўғи 130та пас берди.

– "Барса" рақибга ўз дарвозаси томон 1та аниқ зарба беришга имкон берди.

— "Кўк-анорранглилар" бутун майдон бўйлаб биртепар услубдаги узатмалар орқали тўпни назорат қилишди, рақибнинг ҳар қандай прессингидан чиқиб кетишди. Шундай услубдаги комбинация орқали чиройли гол уришди.

— Аммо "Барселона" голли вазиятларни кўп яратмади. Яратилган вазиятларнинг барчаси Мессининг ташаббуси орқали юзага келтирилди.

— Кике Сетьен 20 ёшли Рики Пучга имконият берди. Жамоа тарбияланувчиси ҳисобланган ушбу футболчи кўпчиликда ижобий таассурот қолдирди. Пуч 71-дақиқада Ракитичнинг ўрнига захирадан тушди ва мураббийнинг ишончини оқлади. У рақибдан тўпни олиб қўйиб, гол билан якунланган ҳужумни бошлаб берди.

Пуч майдонда ҳаракат қилган 20 дақиқа давомида 39та узатма беришга муваффақ бўлди. Бу орқали у "Гранада"нинг ҳар қандай футболчисидан (36) яхшироқ натижа қайд этди.