Шукрки, медиамайдонда футбол ҳақидаги мулоҳазаларимни улашадиган кўрсатувлар кўп. Ва яхши томони, уларнинг ҳар бири ўзига хос. Такрори йўқ.

"Футбол плюс"даги таҳлилларда асосан кескин фикрлар, юмор ва қарши мулоҳазаларнинг кўплигига сабаб — учлик бир-бири билан жуда яқин, "сенлашиб" гаплаша олади, қарашлардан гап нима ҳақдалигини фаҳмлаб кетади, осон келишамиз. Футбол тили билан айтганда, пасларни қарамай узатадиган даражадаги тушуниш бор ўртамизда.

"Футбол студияси". Турли авлод суҳбати. Ўзимдан келиб чиқсам, "Футбол плюс"да тенгқурларим билан гаплашиб роҳатлансам, "Футбол студияси"да ўзимдан ёш авлоднинг, аниқроғи укаларимнинг гапларидан маза қиламан. Статистика, фактлар, янгича фикрлар, қойил қолиб ўтираман кўпинча.

Энг муҳими, бу ерда ўзимни сипороқ тутаман. Ҳурмат қилиб сўз беришганда, ўта ҳазиллашиш ҳам тўғри келмайди.

... ва "14-ҳудуд". Бу ғирт ўзим билан суҳбат. Нариги кўрсатувларда шерикларим ҳолати билан ҳисоблашишга мажбур бўлсам, "14-ҳудуд"да бу масъулиятдан фориғман.

Камера қаршисида фақат ўзим бўламан. Ҳеч кимни кутмайман, ҳеч кимнинг фикрини давом эттирмайман, шундоқ, ўзим билан ўзим гаплашиб ўтиравераман.

Ана шу "14-ҲУДУД" кўрсатувининг янги сони бугун, соат 18:00да FUTBOL TV каналида "эфирга узатилади.

"Футбол плюс"дан, "Футбол студияси"дан авайлаб-асраб олиб чиққан фикрларим билан ўртоқлашмоқчи бўлсангиз, вақтингизни аяманг. Ҳар ҳолда, одам ўзи билан ёлғиз қолгандаги гаплари самимийроқ бўлади...

Хайрулла Ҳамидов.