“Локомотив“ футболчиси Даврон Умиров “Хўжанд“ жамоасига қарши учрашувдан кейин клуб матбуот хизматига интервью берди.

— Бугун йигитлар яхши ўйнади. Бугун ўзимизга бўлган ишончни қайтариш учун ғалаба жуда керак эди ва бунга эришдик. “Хўжанд“ ҳам ёмон жамоа эмас экан. Уларнинг йиғилганига кўп вақт бўлмабди. Ушбу жамоа ҳам ўз ўйинини топиб олиши учун вақт керак бўлади. Асосийси бугун бизга ғалаба керак эди.

— Жамоа бир неча ўйинларда гол кирита олмади. Футболчилар бундан тушкунликка тушдими?
— Йўқ, тушкунликка тушмадик. Шунчаки ўз ўйинимизни топа олмай қолдик. Ўзимизга ишончни қайтариш учун голлар керак эди. Бугун мана голлар билан ғалабага эришдик. Бундан буёғига барчаси яхши бўлиб кетади.

— Ўз ўйинингиздан қанчалик қониқяпсиз?
— Бунисини билмадим. Мураббийлардан хатоларимизни сўраб оляпмиз, назарий машғулотларда улар барча камчиликларни айтиб беришмоқчи. Ўйинимиз ўзгармоқда. Тўп узатишлар ҳам анчагина яхши бўлиб қолди, деб ўйлайман.

— “Локомотив“га келганингизга кўп вақт бўлмади. Дастлабки таассуротлар қандай бўлмоқда?
— Барча футболчилар бир— бири билан аҳил ва иноқ, барча бир оила. Ёши катта футболчилар ўзларидан кичкина футболчилар нимадир сўраганида ўзини манманликка олмаяпти. Тўғри ва чиройли тушунтириб, ҳурмат билан гаплашишяпти.

— Мавсум давомида асосий таркибда ўйнаб кетишингизга қанчалик даражада ишонасиз?
— “Локомотив“нинг ғалабаларига ёрдамимни бермоқчиман. Худо хоҳласа, ҳеч кимни уялтириб қўймайман.

— Ушбу мавсум олдидан ўз олдингизга қандай мақсадлар қўйгансиз?
— Биринчи навбатда, жамоанинг манфаатлари. Иккинчи ёки учинчи ўрин эмас, фақатгина биринчи ўрин ҳақида ўйлаймиз. Шу орқали ОЧЛда яхши ўйинлар кўрсатиб, олдимизга яна— да катта мақсадлар қўйиб бораверамиз.

— “Локомотив“га илк келганингиздан бери ким билан тезда чиқишиб кетдингиз?
— “Локомотив“га келишимдан олдин кўплаб футболчилар билан таниш эдим. Барча жамоадошларим билан чиқишиб кетишим учун бир ҳафта етарли бўлди.