Франция терма жамоаси собиқ ярим ҳимоячиси Эммануэль Пети «Барселона» ҳужумчиси Лионель Мессининг «Манчестер Сити»га ўтиши мумкинлиги ҳақидаги миш-мишларга ўз фикрини билдириб ўтди.

«Месси — Криштиану Роналду эмас. Жисмоний жиҳатдан у бундай машина эмас. Роналду – монстр, 32 ёшли Месси эса юқори савияда ўйнаши учун 1-2 йил вақт қолди.

Ҳаттоки, "Барса"нинг ажойиб футболчилари билан бирга ўйнашига қарамай, у аввалгидек тезлик ва дриблинг кўрсата олмаяпти. Ишончим комил, у футболчилик фаолияти охирига етаётганини тушуниб турибди.

Очиғини айтсам, унга тезкор бўлган Англия чемпионати мос келмаса керак. Унга нисбатан зич ҳаракат қилинса, у билан кураш олиб борилса — бу ҳолат унга ёқмаса керак. Испанияда эса уни эҳтиёт қилишади.

Англиялик мухлислар учун уни кўриш ёқимли бўларди, аммо «Ман Сити» каби жамоа 32 ёки 33 ёшли Месси билан шартнома имзолаши учун сабаб кўрмаяпман. Агар «Сити» уни қўлга киритишни истаса, бу ишни икки йил аввал қилиши керак эди», – деди Пети.