Европа лигасига Англиядан учта жамоа чиқди ва уларнинг ичида “Арсенал” ғолиблик учун кўпроқ эътибор қаратади, дегандик. Турнир жадвалидаги ҳолати шуни тақозо этарди. Бироқ, Манчестернинг мовий томонига жазо қўлланилиши ортидан лондонликларда ҳам Европа Чемпионлар Лигасига йўлланма учун имконият пайдо бўлиб қолди – “Челси”дан етти очко ортда, катта фарқ эмас.

Энди Артета кучни тенг тақсимлашни ё қайси томонга кўпроқ ажратишни ўйлаётган бўлса, ажабмас.

Охирги турда “Арсенал” таркибида бир қатор етакчилар захира ўриндиғида эди – Торрейра, Ляказетт ва Мартинелли. Демак, испаниялик мутахассис Европа лигасига ҳам эътиборсиз эмас. Қуруқ қўл билан “Олимпиакос”дан ўтиб бўлмаслигини билади. Греция клуби ҳам “Арсенал” сингари мураббийини алмаштирди. Янги мутахассис билан услуби ҳам ўзгарди.

Олдинги ҳолида ҳам “Олимпиакос” ёмон таассурот қолдирмаган. ЕЧЛ гуруҳ баҳсларида иккинчи йўлланма учун “Тоттенҳэм”га рақобатчи бўлганди. “Бавария”га ҳам икки ўйинда етарлича ташвишлар туғдирган. Қисқа қилиб айтганда, у бу турнирга юқоридан мағрур ҳолда тушди. Артета йигитлари жиддий тер тўкишларига тўғри келади.

Хуллас, бир-бирига кўп жиҳатдан ўхшаш клублар. Яхши ўйин бўлади. Тунда бўлишига қарамай, ўтказиб юбормасликни сўрардим. Бирга кузатамиз.

01:00да!!!