“Биз пул эмасмиз, биз талантлармиз. УЕФА бизни ёмон кўрса, кимлигимизни кўрсатиб қўйишимиз керак!”
Пеп Гвардиола таътилдан қайтган йигитларига тўғри сўзларни топа билди. “Вест Ҳэм” билан кечган баҳсда “шаҳарликлар” мавсумнинг энг яхши ўйинларидан бирини ўтказишди.
УЕФАнинг жазоси “МанСити”ни қайтанга уйғотгандек туюлди.
Тўғри, “Вест Ҳэм” даража эмас. Жамоа ҳозирда энг омадсизлардан бири. Ҳақиқий даражани исботлаш соати етиб келди – Пеп учун омадсиз ўйингоҳ “Кинг Пауэр”да Брендон Роджерс жамоасини синовдан ўтказади. Ҳа, бу сафар яққол фаворит – меҳмонлар.
Лестерликларнинг охирги натижалари ёмон томонга қараб кетган. “Сити” билан фарқ тўрт очкога етгани етмаганидек, пастдаги клублар яқинлашиб қолишди. “Лестер”нинг бахтига тўртинчи ўриндаги “Челси” янада ностабил. “Тулкилар”нинг 2020 йилдаги натижалари ёмонлашишига таянч зонасида кўп меҳнат қиладиган нигериялик Ндидининг йўқлиги сабаб. Ҳозирча “иккинчи Канте” ўрнини ёпадиган куч йўқ “Лестер”да. Ҳатто бугун бошқа вариантлари ҳам ўйнай олмайди. Роджерс учун ёмон туш...
Хуллас, “Реал” билан ўйиндан олдин тайёргарлик кўриш учун зўр имконият – “Лестер” уйида уч очко ва иккинчи ўринни кейин ўйламаслик, Зиданга қарши УЕФАдан олинган мотивация...
Кечагина ҳаммаси Гвардиола клубига фожиалидек кўринаётганди, бугун сценарий ўзгармоқда. Балки Европа Футболи Уюшмаси раҳбари “ситичи”дир, жамоани ниҳоят еврокубокларда уйғотиш учун шу ишларни амалга ошираётгандир, а?!
Майли, “Реал”гача ҳали бор, бугун “Лестер”га қарши ўйинини кўриб қўямиз.
Шарҳида ўзим.
Умид қиламанки, Варди муносиб қаршилик кўрсатади.
22:30да Узрепорт каналида кўришгунча!