Испания чемпионатининг 25-тури доирасида "Реал" сафарда "Леванте" клуби меҳмони бўлиб, кутилмаганда, ютқазиб қўйди.

Зидан ушбу ўйинга жанговар таркибни ташлади, аммо валенсияликлар мардонавор ўйин намойиш қилишди. Мезбонлар рақибнинг кўплаб хавфли ҳужумларини қайтаришга муваффақ бўлишди.

Ўз навбатида мадридликлар ҳам кўпгина имкониятлардан фойдалана олишмаганини таъкидлаш лозим. Хусусан, биринчи бўлимда Бензема қулай вазиятда зарба бериш ўрнига шеригига узатма беришга қарор қилиб, имкониятни қўлдан чиқарди. Иккинчи бўлимда эса Азар дарвозабон билан яккама-якка вазиятга чиқиб бориб, муваффақиятли зарба бера олмади.

Ўйин тугашига 12 дақиқа қолганида эса "Леванте" яримта имкониятни голга айлантирди. Олис масофадан узатилган тўпга Хосе Луис Моралес етиб борди ва ўткир бурчак остида жуда кучли ва аниқ зарба билан Куртуани доғда қолдирди.

Шу тариқа, "Реал" жадвалнинг иккинчи қисмида бораётган жамоага сенсацион тарзда ютқазди ва Испания чемпионатида пешқадамлик мавқеини топширди.

"Мадрид"ни 26 февраль куни Европа чемпионлар лигаси нимчорак финал босқичи доирасида "Манчестер Сити", 1 март куни эса Ла лига доирасида "Барселона"га қарши ўта муҳим ўйинлар кутиб турибди.

Испания Ла лигаси, 25-тур
Леванте – Реал Мадрид 1:0 (0:0, 1:0)
Гол: 1:0 – 79 Моралес.
Леванте – Фернандес, Постиго, Тоньо, Бруно Гонсалес, Мирамон, Вукчевич, Барди, Кампанья, Рохер Марти (Мелеро, 67), Майораль (Леон, 88), Моралес (Мартинес, 81).
Реал Мадрид – Куртуа, Варан, Рамос, Карвахаль, Марсело, Модрич (Вальверде, 81), Каземиро, Иско (Васкес, 73), Кроос, Азар (Винисиус Жуниор, 67), Бензема.
Огоҳлантиришлар: Рамос (10), Рохер Марти (35), Каземиро (71).