Италия чемпионатининг 26-тури доирасида марказий ўйин бўлиб ўтди. «Ювентус» ўз майдонида бўш трибуналара қаршисида «Интер»ни қабул қилиб, ишончли ғалабани қўлга киритди.

Бўлимнинг дастлабки 15 дақиқасида мезбонлар ҳисобни очиш учун 2та имкониятга эга бўлишди. Аммо йўлланган зарбаларни Ханданович қайтаришга муваффақ бўлди. Танаффусга 8 дақиқа қолганида Шчесни "Юве"дан голдан қутқарди.

Баҳснинг 55-дақиқасида эса ҳисоб очилди. Матюиди чап қанотдан жарима майдонига кирди ва дарвоза майдончасига узатма берди. Роналду тўхтатиб берган тўпни Рэмзи яқин масофадан дарвозага жойлаб қўйди.

Орадан кўп ўтмасдан Пауло Дибала маҳорати эвазига рақиб дарвозасига иккинчи тўпни жойлади. Аргентиналик футболчи ўнг қанотдан Рэмзига узатма берди ва жарима майдонига яқинлашди. Дибала жамоадошидан тўпни қайта қабул қилди ҳамда финт ишлатиб Янг ва Шкриньярдан ўтиб кетди. Унинг 10 метрлардан йўллаган зарбасини Ханданович қайтара олмади.

Учрашувнинг 79-дақиқасида Эриксен ўйинга интригани қайтариши мумкин эди. Аммо даниялик футболчининг зарбасига бироз аниқлик етишмади. Иккинчи таймга қўшиб берилган дақиқаларда Роналду бир ҳужумнинг ўзида иккита зарба беришга муваффақ бўлди. Аммо ҳар сафар унинг зарбаларига бироз аниқлик етишмади.

Ушбу ғалабадан кейин "Ювентус" ўз очколарини 63та етказди ва 1-ўринга қайтди. "Лацио" туринликлардан 1 очко ортда қолаётган бўлса, "Интер" битта захира ўйинига эга бўлган ҳолда 9 очко ортда қолиб кетди.

Италия А серияси, 26-турнинг қолдирилган ўйини
ЮВЕНТУС – ИНТЕР - 2:0 (0:0, 2:0)
Голлар: 1:0 – 54 Рэмзи, 2:0 – 67 Дибала.
Ювентус – Шченсни, Куадрадо, де Лигт, Бонуччи, Алекс Сандро (Де Шильо, 77), Рэмзи, Бентанкур, Матюиди, Дуглас Коста (Дибала, 59), Игуаин (Бернардески, 80), Роналду.
Интер – Ханданович, Шкриньяр, де Врей, Бастони, Кандрева (Гальярдини, 74), Весино, Брозович, Барелла (Эриксен, 59), Янг, Лукаку (Санчес, 77), Мартинес.
Огоҳлантиришлар: Шкриньяр (63), Весино (71), Брозович (79), Роналду (87).
Четлатиш: Паделли (79).