“Муқаддас замин” фильмида Салоҳиддин Аюбийдан: - Қуддус сиз учун нима? – деб сўралганида, зўр жавоб берган: “Қуддус мен учун ҳамма нарса... ва шу билан бирга “ҳеч нарса”.

Бугунги коронавирус ва футбол масаласида ҳам шу жавобни келтирган бўлардим. Фақат тескари вариантда.

Футболни ўта юқори даражага чиқариб юборганимиз, яхши кўрганимиз боисидан унинг қолдирилиши, режалари бузилишини тасаввур қилмаган эканмиз. Италия А серияси раҳбарлари мамлакатда бу вирус кенг суратда ривож олаётганда, ўйинлар барибир ўтишини, ҳеч бўлмаса мухлисларсиз ўтишини таъкидлашганди. Вазият оғирлашгач, уларнинг ўзлари ҳукумат раҳбарларига А серияни вақтинча тўхтатиб туришни илтимос қилишди. Ҳозирда Англияда шунақароқ вазият.

Вирус шиддатли тарзда таҳдид солаётганда, шаҳарлар бўшаб қолаётган лаҳзаларда футболнинг асл даражаси юзага келгандек. У жамиятнинг нечанчидир ўнлигига ҳам кирмаслигини, усиз ҳаёт тўхтаб қолмаслигини англаб етдик. Футболчиларнинг ўзлари ҳам қўрқиб кетишди. Италия клублари самолёти Испания заминига қўнмасин, деб сўраган ҳам футбол аҳли бўлади. Ўртага инсон жони қўйилган вақтда футбол тугул бошқа нарсаларни ҳам йиғиштириб туриш лозимлиги тасдиқланди.

Шу билан биргаликда, яқинда насиб қилса вирусга даво топилади, кунлар исиб кетса, Худо хоҳласа, маскалар ечилади, карантинлар тугайди. Шунда ҳамма ўз севган ишига қайтади. Биз, мухлислар, футболчилар, умуман дунё аҳли футболга қайтади. Ва биласизми шунда нима бўлади?  

Соғинч ёшларидан униб чиққан майсалар устида чарм тўп тепилиши биланоқ кўзларимиз яна ёшланади. Асир озодликни соғиниб, унинг бағрига ўзини отган мисол стадионга ошиқамиз, Футбол тв орқали Европа футболини томоша қилишни бошлаймиз ва бирдан ФУТБОЛ – ҲАММА НАРСА ЭКАНЛИГИНИ англаб қоламиз.

Озгина сабр, ўртоқлар! Насиб қилса, озгина қолди. Ҳаммаси яхшилик билан тугайди. Бу бало аввало юртимизни четлаб ўтсин, жаҳон аҳлини даф этсин ва футболни бизга қайтарсин. “Ҳеч нарса”ни “ҳамма нарсамиз”га айлантирсин.

Мақола сўнггидаги хулоса: Коронавирус бизга икки масалани тушунтириб қўйди: Инсон ҳаёти ўта муҳим ва футбол аслида биз ўйлаган даражадан юқоридаги спорт тури экан.

Хайрулла ҲАМИДОВ