Хабарингиз бор, айни вақтда коронавирус пандемияси тарқалишини олдини олиш мақсадида барчамиздан уйда қолиш талаб қилинмоқда. Натижада, барча мамлакатларда футбол учрашувлари ўтказилмаяпти.
Хўш, ўзбекистонлик футболчилар карантин даврини уйда қандай ўтказишмоқда? Улар мухлисларга бу борада нималарни тавсия қилишади?
Бугун бу ҳақда “Бухоро” жамоаси етакчиларидан бири – Зоҳир Пиримов билан суҳбатлашдик.
“Барча қатори мен ҳам айни вақтда карантинни уйда, оила даврасида ўтказяпман. Фарзандларимга “онлайн дарслар”ни бажаришида кўмаклашяпман. Мухлисларга, барча юртдошларимизга ҳам уйда қолиб, шахсий гигиена қоидаларига риоя қилишларини тавсия қилган бўлар эдим. Айнан шу орқали ушбу касалликни енгиб ўтишимизга ишончим комил.
Албатта, ҳозирги шароитда барча спортчилар қатори футболчиларга ҳам жисмоний ҳолатни юқори даражада ушлаб туриш бироз қийинчилик туғдиради. Майдонда тўп билан ишлашнинг имкони йўқ. Шундай бўлсада, уйда жисмоний машқларни бажариш орқали спорт формасини сақлашга ҳаракат қиляпман.
Ўйлашимча, юзага келган танаффус чемпионат ўйинларига, натижаларга у қадар та`сир кўрсатмайди. Чунки, ҳозир барча бир хил шароитда ва карантин тугаб, чемпионат старт олганда ҳам, жамоалар бир хил шароитда, бир хил формада етиб келади”, – деди Пиримов.
