Россиянинг "Советский Спорт" нашри Беларусь чемпионатида ўйнаётган иқтидорли футболчиларга аҳамият қаратиб, уларни Россия клубларига тавсия қилди. Улар орасида "Энергетик-БГУ" форварди Жасур Яхшибоев ҳам бор.

Нашр ўзбекистонлик футболчи ҳақида қуйидагиларни ёзди:

"Ўзбекистонлик легионер, мавсумнинг асосий кашфиётига айланди. У «Энергетик» сафига ижара асосида «Пахтакор»дан келди. У мавсумолди йиғинларнинг асосий қисмини ўтказиб юборган бўлса-да (Ўзбекистон олимпия терма жамоаси сафида Осиё чемпионатида иштирок этди), мавсумни ажойиб бошлади.

Яхшибоев – классик қанот ҳужумчиси. Тезкор, техникаси яхши, қўрқмасдан рақибларни алдашга киришади, тўпни яхши ушлайди, ҳар иккала қанотдан марказ томон сурилиб, дарвоза томон зарба беради. Бундан ташқари, у совуққон. БАТЭга қарши бўлиб ўтган дастлабки ўйинда рақиб ҳимоячилари ва дарвозабонини бирин-кетин алдаб ўтиб, бўш қолган дарвозага тўпни жойлади.

Бундан ташқари, Яхшибоев – фақат ўзини ўйлайдиган футболчи эмас. У майдонни яхши кўради. Рақиб ҳимоячилари ортига узатма бера олади, шериклари билан "девор" ўйнай олади. Стандартлардан аниқ узатма беради. «Рух»га қарши ўйинда (1:0) унинг узатмасидан кейин ҳимоячи Даниил Мирошников ғалаба тўпини киритди.

Жасурбек жамоасининг 6та голидан 5тасида бевосита иштирок этди. Дастлабки 3та турда марказий ҳужумчи вазифасида ўйнаган бўлса-да, унга қанотларда бўш ҳудудни қидириш кўпроқ ёқиши кўриниб турибди.

Кимдир уни янги Риёд Маҳрез деб атай бошлади. РПЛ клублари, ушбу иқтидор эгасига аҳамият қаратинг!"