Жаҳон бўйлаб коронавирус пандемияси тарқалгани учун март ва июнь ойидаги ФИФА кунлари бекор қилинганидан хабарингиз бор. ФИФА вице-президенти Монтальяни тарқатган хабарга кўра, куз фаслидаги терма жамоалар иштирокидаги ўйинлар тақдири сўроқ остида қолмоқда.

«Бизнинг асосий мақсадимиз — миллий чемпионатлар. Терма жамоаларнинг сентябрдаги ўйинлари ҳамон режалаштирилган, аммо кейинчалик нима бўлишини ҳозирдан айтиш қийин. Мамлакатлар чегараларини кесиб ўтишда муаммоларга тўқнаш келишимиз мумкинлигини истисно қилмайман. Назаримда, 2021 йилнинг март ойига келиб барчаси жойига тушади ва терма жамоалар ўйнашда давом этади», – деди Монтальяни.

Эслатиб ўтамиз, Осиё минтақасида ЖЧ-2022 саралашининг 2-босқичи, режага кўра, июнь ойида якунига етиб, сентябрь ойида учинчи босқич старт олиши керак эди. Энди саралаш турнири тақвимига ўзгартириш киритилади.