Мадейрада жойлашган «Насьонал» клуби президенти Руи Алвеш «Ювентус» ҳужумчиси Криштиану Роналдуга жамоа стадионида шуғулланиш имконини бергани ҳақида гапириб берди.

Эслатиб ўтамиз, 35 ёшли португалиялик футболчининг карантин пайтида ўз уйи яқинидаги «Насьонал» клуби машғулот базасида шуғуллангани норозиликларга сабаб бўлди. «Насьонал» Криштиану ёшлик пайтида шуғулланган жамоалардан бири ҳисобланади.

«Криштиану бизга қўнғироқ қилди ва биз бажонудил унга шуғулланиш имконини бердик. Биз санитария қоидалари ва Мадейранинг коронавирус борасида қонунларига бўйсунамиз.

Криш бизнинг тарбияланувчимиз ва «Насьонал» академиясининг энг яхши вакили ҳисобланади. Роналду — суперпрофессионал ва ажойиб инсоний хусусиятларга эга. У — бизнинг фахримиз. Футбол тарихидаги энг яхши футболчи бизнинг оролчамизда дунёга келган.

У стадионга ҳар куни келмайди. Баъзида эрталаб, баъзида кундузи келади. Бу унинг машғулот дастурига боғлиқ. Мадейра иқлими унга янада кўпроқ ижобий энергия беради. У кўп шуғулланади ва мазкур фавқулодда ҳолатнинг тезроқ якунланишини кутяпти.

Назаримда, у «Ювентус»да ўзини бахтли ҳис қилмоқда. У яна бир неча йиллар давомида Туринда қолади, деб ўйлайман. У "бьянконери" футболкасида Скудетто, Чемпионлар лигаси ва «Олтин тўп»ни қўлга киритишини истайман», — деди Алвеш "Tuttosport" нашрига берган интервьюсида.