Мадриднинг «Реал» клуби ҳужумчиси Карим Бензема фаолиятининг сўнггида Франциянинг «Лион» клубида ўйнашга қарши эмаслигини яширмади.

32 ёшли франциялик ҳужумчи «Лион» клуби тарбияланувчиси ҳисобланади ва айнан мана шу клубда катта футболдаги дебютини ўтказган. У 2009 йилнинг ёзида Мадриднинг "Реал" клубига 35 миллион еврога сотиб юборилган.

«Мен "Лион" клубига қандай боғланганимни одамлар билади деб ўйлайман. Яқин вақтлар ичида қайтишим мумкинми? Йўқ, чунки, айни пайтда дунёнинг энг зўр клубида ўйнайман. Фаолиятимнинг охирларида «Лион»га ўтаман ва ўша ерда бутсаларимни михга иламан.

Мен «Лион»ни кузатиб бораман ва менинг акамларим Лига 1 ўйинларини кўп томоша қилишади. "Лион" катта ўйинларда ўзини яхши тутиши менга ёқади. Уларда ғалабага ташналик бор, лекин, кучсизроқ клубларга ютқазиб қўйишади. Мана мени нима ғазаблантиради. Эҳтимол, улар хотиржамликка берилиб кетишар… Аммо, ЕЧЛ доирасида уларни сафарда мағлуб этиш қийин масала», — деди Бензема OL TV билан интерьвюда.