«Челси» ярим ҳимоячиси Виллиан фаолиятини қайси жамоада давом эттириш истаги борлигини маълум қилди. Аввалроқ 31 ёшли бразилиялик футболчининг хизматига «Арсенал» қизиқиш билдираётгани ҳақида хабар тарқатилган эди.

«Ҳақиқатан ҳам қийин танлов. Мен "Челси"да кўп нарса ўргандим, клубдаги ҳар бир ходим ва ҳар бир мухлисни яхши кўраман. Аммо, айтганимдек, "Челси"ни тарк этадиган бўлсам, рақобатбардош клубга ўтишни истайман. Лондонда қолишни истайманми? Билмадим. Менга ва оиламга Лондон ёқади. Лондоннинг бошқа жамоасига ўтаманми ёки Англияни тарк этаманми, буни ҳанузгача билмайман», — деди Виллиан "Mundo Deportivo" нашрига берган интервьюсида.

Виллиан ушбу мавсумда "Челси" сафида барча мусобақалар доирасида 37та ўйинда майдонга тушиб, 7та гол урди ва 6та голга узатма берди. У ушбу мавсум сўнгида эркин агентга айланади.