Каталониянинг "Барселона" клуби бош мураббийи Кике Сетьен коронавирус пандемияси туфайли тўхтатилган жорий мавсумни қайта тиклаб, якунлаб қўйишга умид қилмоқда.
"Барчамиз нормал ҳаётга қайтишни хоҳлаймиз. Ҳаммага коронавирус ва унинг таъсири жуда қаттиқ зарар олиб келди. Футболчилар учун ўз спорт формаларини уй шароитида ушлаб туриш янгилик бўлди, лекин уларни жисмоний тайёргарлик бўйича мураббийларимиз кузатиб туришди.
Биз катта иштиёқ билан иккита мусобақада курашишни давом эттиряпмиз. Иккита совринни қўлга киритишни ўйлаяпмиз. Олдимизда турган барча учрашувларда ғалаба қозониб, Испания чемпионлигини ҳамда ЕЧЛ ғолиблигини қўлга киритмоқчимиз. Аммо, мавсум қандай давом этади деган хавотирлар бор", - Сетьеннинг сўзларидан иқтибос келтирмоқда "Барселона" клуби расмий сайти.
