Бу кун яна бир ажойиб футболчи таваллуд айёмини ўтказади. Тибо Куртуа. Айни пайтда "Реал Мадрид" дарвозасини қўриқлаётган кипер ёшлигида ота-онасининг қистови билан волейболга қатнашган. Ярим профессионал даражада ўйнаган инсонлар фарзандини айни шу спорт турида камол топишини исташган. Аммо билишмаганки, айни шу ҳаракатлари билан дунёга ажойиб бир футбол посбонини тарбия қилиб беришаётганини. Опачаси Валери Куртуа Бельгия терма жамоаси аъзоси, ҳар ҳолда бир фарзандида ота-она орзуси камолини кўришган.

Тибо Куртуанинг “Генк” таркибида майдонга тушиши ҳам тасодиф туфайли бўлган. Ўзидан олдинги уч посбон бир пайтнинг ўзида жароҳат олишади ва мураббий 16 ёшли тажрибасиз йигитчани қўйишдан бошқа илож тополмайди. Ўша пайти қаҳрамонимиз чап қанот ҳимоячиси сифатида ўйнарди.

Кейинги фаолиятида ҳам бельгиялик дарвозабон шунақа вазиятлар омадида яшаган. "Челси" умидли киперни сотиб олганида, Петр Чех ўйнаётгани учун "Атлетико"га ижарага беришади ва Мадриддан 3 йил ичида асосий посбон бўлиб қайтади.  Куртуа шарофатига Бельгия луғатида “Тибоинг” сўзи пайдо бўлади. Ватанида бу қадар машҳур бўлиб кетишига сабаб – "Атлетико"даги фантастик иштироки. Симеони икки йил Куртуани олиб қолишга муваффақ бўлган, натижада уч мавсум Испанияда ўйнаган кипер 111 ўйинда қатнашиб, 94 гол ўтказган натижаси билан Лондонга қайтди. Аммо Англияга келар экан, мухлисларига: “Мен барибир Мадридга қайтаман!” деб ваъда берганди. Қайтди. Аммо "Атлетико"нинг ашаддий рақиби томонига.

Яна бир гапи машҳур унинг: “Азар – менинг чин дўстим. Қаерга борсам уни олиб кетаман”. Бу гапни қай маънода айтган билмадиму, бироқ, ҳозирда воқеликка жуда мос тушиб турибди.

Яна қизиқ фактлардан айтадиган бўлсак, унга энг кўп гол урган футболчи Криштиану Роналдудир. 9 ўйинда 10 гол. Кришдан қутулиш учун келгандим, у ҳам кетиб қолди, деб кулиб қўйган. Инглиз, француз, голланд ва испан тилларини яхши билади. Ўз услубини Эдвин Ван дер Сарга ўхшашлигини айтади. Доимо унга тақлид қилган.

Ана шу посбон бугунги кунда Қироллик клубида фаолият олиб боряпти. Зиданнинг айтишича, у энг яхши кипер. Охиригача ишонганининг сабаби ҳам шундан. 28 га кирди. Истиқболи яхши. Кўрамиз, франциялик мураббий Навасни алмаштиргани борасидаги фикрида ҳақ бўлиб чиқармикан?!

Хайрулла Ҳамидов.