Германия Бундеслигаси қайта бошланиб, катта футбол ҳавоси уфурган бўлса ҳам, мухлисларсиз стадионларни кўриш кўнгилни хижил қилмоқда. Шу сабаб клублар санитария қоидаларини бузмаган ҳолда ўриндиқларни турли йўллар билан тўлдиришга уринмоқда. Аввалроқ Мюнхенгладбахнинг «Боруссия» жамоаси бу борада ўзига хос йўл тутганди.

«Кёльн» клуби ҳам бунга чиройли ечим топди. Клуб ишқибозлардан ўзлари учун омадли ҳисобланган футболка, шарф, ўйинчоқлар жўнатишни сўради ва улар орқали марказий трибуна тўлдирилди.

«Кёльн» клубининг тимсоли айланган Ҳённес IX эчкиси бу сафар майдонга тушмади. Ҳозирча ҳайвонларни стадионларга олиб кириш тақиқланган. Бироқ унинг юмшоқ версияси трибунадан ўрин олди.

Мухлислар ўз балконларида бир вақтда тўпланиб, клуб мадҳиясини биргаликда куйлашини ташкил қилиш мақсадида «Кёльн» расмий сайтида махсус дастур ишга туширилди.

«Майнц»га қарши кечган баҳсда «Кёльн» дастлаб иккита тўп фарқи билан олдинга ўтиб олди, бироқ иккинчи бўлимдаги голлар эвазига меҳмонлар мувознатни тиклашга муваффақ бўлди  — 2:2.