​​1992 йилнинг шу куни Германия футболининг янги “олтин боласи” Марио Гетце дунёга келган. Олдинги олтин бола Оливер Бирхофф эди. Евро-96 финалини бир ўзи ҳал қилган ўша ҳужумчи. Гетце ҳам нисбатан Оливернинг изидан кетди. Финалдаги биргина ҳаракати билан немислар қалбига муҳрланди.

Аслида Марио ўта қобилиятли саналган. Майдонда ҳақиқий ўнлик. Ёшлигиданоқ умид уйғотгани бор гап. Ҳатто бир пайтлар Франц Беккенбауер уни Мессига солиштириб: “баъзи масалаларда ундан ҳам ўтади” деган. Футбол Кайзери айтади: “Ундан яхшисини топиш мушкул. У ҳимоячилар ичидан худди кўринмас одамдек ўтиб кетади”.

Францнинг гаплари ўз асосини топгандек. Мессига бағишланган 2014 йилги мундиал финалида ягона гол айнан Мариога насиб этди. Захирадан майдонга тушган Гетце биргина имкониятидан шу қадар чиройли фойдаландики, ўйиндан сўнг барчанинг нигоҳи фақат унга қаратилган эди.

Фаолиятининг кейинги қисмидаги чўкишлар менимча ўша олтин голга боғлиқ. Марио Роналду ва Месси эрасида уларга насиб қилмаган чўққига чиқиб, бу роҳат таъмини татиб кўргани боисидан клубларида ўйнамаса ҳам бўлаверади, деб ҳисоблади. Гетцега балки мос ҳам тушаверар. Ахир, у невараларига сўйлаб берадиган ажойиб ҳикоя мавжуд ва уни бу бободан бошқа ҳеч ким сўйлаб бера олмайди.

Яна бир маълумот: қаҳрамонимиз Голливуд фильмларининг жинниси. Асосан охири кутилмаган натижа билан тугайдиган фильмларнинг. Ди Каприо мухлиси, “Лаънатланганлар ороли” фильмини суяди. Футбол тақдирини қарангки, нақадар ўхшаш. Ҳамма кўргуликларни ўйлаб топган ўзи бўлиб чиқади охирида.

Хайрулла Ҳамидов