Stadion.uz ёзда гранд жамоалар  алоқага чиқишдан аввал яхшилаб ўйлаб кўриши зарур бўлган футболчилар билан таништириб ўтади. Улар номдор ижрочи бўлиши мумкин, бироқ айни дамда бу трансферлар ўзини оқламаслигининг эҳтимоли жуда юқори.

Раҳим Стерлинг
Трансфер қиймати: 160 миллион евро

Замонавий вингерлар орасида Жейдон Санчо энг бозори чаққонлардан бири бўлиб тургани рост. Шундай бўлсада, “Реал” нишонида Раҳим Стерлинг турибди. Шунга қарамай, “қироллик клуби” Стерлингни сотиб олиши учун яхшилаб ўйлаб кўриши лозим. Тўғри, Раҳим Гвардиоланинг мукаммал тактик схемасига жуда яхши мослаша олди, бироқ у “Сити” етакчиси эмас. Ҳатто Англия терма жамоасида ҳам у асосий футболчи эмас. Агар Гвардиола, ёки Англия терма жамоаси учун ноқулай рақиб майдонга тушса, биз Стерлингнинг жасоратини кўрмаганмиз ҳисоб. У чинакам бир услуб футболчиси. Унинг трансфери учун 100 миллион евро тўлаш орқали, Мадрид клуби ўртачадан сал баландроқ даражадаги вингерни қўлга киритиши мумкин ҳолос. Стерлинг “Реал”нинг янги етакчиси бўлишига ишониш жуда мушкул.

Филиппе Коутиньо
Трансфер қиймати: 90 миллион евро

Раҳимдан фарқли ўлароқ, бразилиялик ярим ҳимоячи 4 та чемпионатда ўз кучини синаб кўришга улгурди. Натижа қандай эканлигини ўзингиз яхши биласиз. Чаққон, теҳникаси кучли Коутино “Бавария”ни ҳайрон қолдиришни уддалай олмаган бўлса, “Барселона” учун чинакам кераксиз футболчига айланиб қолди. Мюнхен клуби Саненинг трансфери учун ҳам Коутиньодан воз кечди. Бартамео томонидан сотиб олинган футболчи учун сарсон-саргардон кунлар бошланиши ҳеч гап эмас. Гап шундаки, айни дамда унинг трансфер қиймати жуда баланд. Боз устига, “Барселона”даги ишончсиз мавсум сабабли уни ҳеч ким ўз сафига қўшиб олишни истамаяпти. Бундай ўйлаб қарайдиган бўлсак, Коутиньо “Ливерпуль”дан бошқа жамоаларда юқори даражадаги футбол намойиш этмаган. Бу омил Юрген Клопп билан боғлиқ эканлиги ҳақидаги фикр тобора ҳақиқатга ўхшаб бормоқда. Агар Коутиньо ҳам кучли мураббий ва ўйин услуби сабабли 150 миллионга баҳоланган бўлса, демак энди уни бирорта гранд сотиб олмаслиги лозим.

Нголо Канте
Трансфер қиймати: 90 миллион евро

Бугунги кунда Нголони ёмон кўрувчи мухлис бўлмаса керак. Меҳнаткаш ва жисмонан бақувват футболчи “Челси” учун муҳим фигуралардан бири бўлиб турибди десак, адашмаган бўламиз. Шундай бўлсада, уни иккинчи Макалеле дейишга шошилманг. Нголо майдонда кучли футболчи бўлишига қарамай, унинг руҳий ҳолати бугунги кунда кўнгилдагидек эмас. Бундан икки йил аввал укасининг ўлимини бошидан ўтказган футболчи яқиндагина шамоллаб қолганидан хабарингиз бор. Канте COVID-19га топширган тести салбий чиққанига қарамай, машғулотларда иштирок этишдан бош тортмоқда. У яқиндагина катта йўқотишни бошидан ўтказгани боис, ўлимдан жуда қўрқиб қолганини яшириб ўтирмаяпти. Биласизми, Канте кучли футболчи, бироқ у Макалеле сингари “Реал”ни кучайтира оладиган даражада руҳий ҳолатда эмас. Ҳатто Канте “Ювентус”нинг ўйинини ҳам янги даражага олиб чиқиши катта гумон остида. Шу сабабли ҳам ПСЖ унинг ўрнига Жоржиньони майдон марказига сотиб олишни истамоқда. Умуман олганда, Нголо туғма жангчи эмас. Шунчаки, у чинакам меҳнаткаш футболчи. Грандларни янги даражага кўтариш учун бу омилнинг ўзи камлик қилиши турган гап.

Усмон Дембеле
Трансфер қиймати: 85 миллион евро

Аслида, Усман Дортмунд шаҳрини ҳам катта жанжал билан тарк этган эди. Ана ўшандаёқ немис нашрлари унинг каталонияда ҳам маш-машалар ўчоғига айланишини тахмин қилишган эди. Афсуски, Бартамео истаганидек Усмон иккинчи Неймар бўла олмади. Машғулотларга кеч қолувчи, режимлар билан иши йўқ ёш футболчининг машғулотларга кеч келиши ҳақидаги гап-сўзлар аллақачон ўзини оқлаб бўлди. Маҳалий нашрларининг маълум қилишича, Месси ва Суаресни Дембеле ғазабини қўзғатиш борасида беназир. Гап шундаки, ёш француз футболни майдонда эмас, виртуал ҳолатдагисига кўпроқ вақт ажратади. Ачинарлиси шундаки, майда деталлар йиғилиб трансфер қийматининг кескин тушиб кетишига сабаб бўлди. Ҳатто Дешам ҳам яқин 3 йил мобайнида Усмондан умид қилмаслиги аниқ. Терма жамоада иқтидорли ёшлар тобора кўпайиб бормоқда. Шундай экан, Дембеленинг фаолияти энди ўнгланишига ишониш мушкул. Бунинг учун ундан кучли ирода талаб этилади. Жароҳатлар борасида аллақачон мутахассисга айланиб улгурган Дембеленинг бирорта гранд жамоа билан омадли мавсумлар ўтказишига ишониш жуда ва жуда мушкул.

Эмерик Ляпорт
Трансфер қиймати: 50 миллион евро

Агар “Барселона” Эмерикни Пике билан тандемда ҳаракат қилишини истаётган бўлса, натижа кутилганидек бўлмаслиги аниқ. Унинг “Манчестер Сити”даги ишончли ўйини ортида Гвардиоланинг меҳнатлари ётибди. Тан олиш лозим, Ляпорт Виржил Ван Дейк даражасига чиқа олганича йўқ. Ваҳоланки, ўз вақтида “Сити” “Ливерпуль” Вижрилга тўлаган пулни Эмерик учун сарф этган эди. Натижа эса, бир ҳил бўлгани йўқ. Эндиликда, Ляпорт ҳатто Франция терма жамоасидаги ўрнини ҳам қайтариб оламайди. Дешам аллақачон муносиб алтернатив вариантларни танлаб олган. “Барса” учун Ляпорт Гвардиола “ташлаб кетган” ўйин услубининг давомчиси сифатида кўрингани билан, унда катта наф чиқариш мушкул. Сабаби, Ляпорт ўзининг "пик" даражасини кўрсатиб бўлди. Энди у бундан ортиғини намойиш эта олмайди. Шу сабабли, ҳатто ПСЖ ҳам уни ўз трансфер шортлистидан ўчириб ташлади. Бундай паллада, “Барселона” ўз тарихидаги яна бир омадсиз трансферни амалга ошириши мумкин. Яна ким билади дейсиз?!

Поль Погба
Трансфер қиймати: 100 миллион евро


“Ювентус” Погба кетгач, “сочилиб” кетгани йўқ. “Манчестер Юнайтед” эса, Пол билан аввалги даражасига чиқа олмади. У ҳам Коутиньо сингари жуда қиммат, бироқ кераксиз машинага ўхшайди. Унинг жамоада бўлиши статусни ошириши мумкин, бироқ бундан клублар майдонда катта наф чиқаришлари мушкул. Боз устига, унинг Мино Райола билан ҳамкорликда иш олиб бориши вазиятни янада чигаллаштиради.   Ярим ҳимоячи “Ювентус”да ҳам, “Реал”да ҳам “тўнтариш”ни амалга оширишига ҳеч ким ишонмай қўйди. Эътиборлиси шундаки, “қизил иблислар” Бруно Фернандешни сотиб олгач, етакчига эга бўлишди. Эндиликда, улар учун Погба биринчи рақамли футболчи эмасдек туюлмоқда.   “Реал”да Кроос ва Казимиро ўз ўрнини бўшатиш ниятида эмас. “Ювентус”га ўтиш учун ўз моашини қисқартирилишига рози бўлиш талаб этилади. Умуман олганда, Погба ёзда қайсидир гранд жамоа учун етишмай турган детал бўлиши мушкул.