Мухлисларсиз ўтадиган футболда баъзи журналистлар "Барселона" имкониятларини тушиб кетишини тахмин қилишмоқда. Бунга сабаб эса, бу мавсумда каталонияликлар "Камп Ноу"да 95 фоиз очко олган бўлишса, сафарда бу жуда ёмон - 40 фоиз. Бу эса, "Барселона"ни "уй жамоаси" дейишга сабаб бўлган.

Менимча эса, бир жамоанинг уй ва сафар учрашувлари ўртасида бу қадар катта фарқнинг бўлиши фақат ўз мухлисларининг ёрдами туфайли эмас. Яъни "Барселона" ўз уйида мухлислар ёрдами билан фоизни 95 га кўтармаган, аксинча, сафарда, рақиб жамоа мухлисларининг фаолликлари оқибатида сафар ўйинлари кўрсаткичи 40 фоизга тушиб кетган.

Иккинчи вариантга ишониш осон, чунки одатда, кучсизроқ клублар кучли рақибига етарли қаршилик қила олишда мухлислар ёрдами қўл келади. Ўйиннинг эмоционал шароитга ўтиши кўпроқ кучсизроқ жамоанинг имкониятини оширади. Буни биз масалан, "Барселона"нинг сўнгги йиллардаги энг аламли мағлубиятлари - Рим ва Ливерпулдаги ўйинларда ҳам кўришимиз мумкин.

Яъни, трибунада мухлисларнинг йўқ бўлиши, аксинча, "Барселона"га ёрдам беради ва сафар ўйинларидаги 40 фоизни оширади, менимча. Ўз майдонида эса, кучли жамоа шундоқ ҳам рақибини енгиши мумкин.

Қаҳрамон Асланов