"Манчестер Юнайтед" АПЛга тайёрланиш асносида "Вест Бромвич" билан орқама-кетин икки ўйин ўтказади. Ҳар бир ўйин бир соатдан давом этиб, икки хил таркиб ҳаракат қилар экан.

Биринчи ўйинда майдонга тушадиган жамоа таркиби қизиқ:

Ромеро, Бишоп - Байи, Туанзебе, Менги, Уильямс, Далот, Фосу Менса - Матич, Погба, Фернандеш, Гомес - Гринвуд, Рэшфорд, Марсиал, Жеймс.

Таркибнинг қизиқ томони шундаки, биринчи таркибдаги ҳимоя чизиғи деярли захира ҳимоячиларидан тузилган ва Магуайр, Линделоф, Шоу, Биссака каби ҳимоячилар киритилмаган.

Олдинги чизиқ эса, аксинча, асосий ҳужумчиларнинг ҳаммаси шу ерда, ярим ҳимояда ҳатто Погба - Фернандеш тандемини ҳам кўришимиз мумкин. Таркиблар биринчи ва иккинчига эмас, мана шундай аралаш ташкил этилган.

Менимча, бунинг сабаби, айнан олдинги чизиққа, Погба ва Фернандешнинг бирга ўйнаши, уларнинг Рэшфорд ва Марсиал билан боғламларга урғу берилишидир. Ҳимоя эса, атайлаб "заифлаштирилган". Чунки Погба ва Фернандешнинг бир таркибда бўлиши таркибдаги мувозанатга путур етказишини, ҳимояда бўшлиқлар юзага келишини кўпчилик тахмин қилаётганди. Албатта, бир икки ўйинда, айниқса, Чемпионшип жамоаси билан бу камчиликларни англаш қийин. Шунинг учун ҳам, Сульшер янада кучсиз ҳимояни тушириб, муаммони тезроқ кўриб, текшириб олмоқчига ўхшайди.

Магуайр каби футболчилар баъзи ўйинларда Погба ёки Фернандеш қолдирган бўшлиқларни ёпиб тура олади, аммо баъзи ўйинларда панд ейилиши мумкин. "Вест Бромвич" савиясидаги жамоа билан ҳаммаси жойида бўлиб, кучлироқ босимда тизим сўкилиб кетиши мумкин.

Бугун эса, ўша панд ейиладиган баъзи ўйинлар атайлаб юзага келтирилмоқда. Қизиқ бўлади.

Қаҳрамон Асланов