Ўзбекистон профессионал футбол лигаси директори Диёр Имомхўжаев Суперлиганинг рестарти ҳақида фикр билдирди.

"3 ой деганда футболни бошлаш арафасида турибмиз. Бу йўлда катта иш қилинди, умид қиламанки, дунёнинг ҳеч бир нуқтасида футбол қайтиб бундай танаффус олмайди.

Насиб бўлса, декабрнинг иккинчи декадасида 2020 йилги мавсумни якунлаб оламиз. Унгача қатор муаммоларни ҳал қилишга, том маънода профессионал бўлиб ишлашга интиламиз. Бу йўлда танқидлар, тушунмовчиликлар бўлиши табиий бир ҳол. Биз уларга босиқлик ва аниқлик билан жавоб қайтаришга ҳаракат қиламиз. 4-турни ўтказиб олишимиз ҳамоноқ 2021 йилги мавсум режаларига киришамиз, келаси йилги чемпионат энг яхшиси бўлиши устида ишлаймиз.

Футбол мухлисларимизни қайтаётган футбол куни билан жамоамиз номидан табриклайман. Биз уларни бугун стадионларга таклиф эта олмаяпмиз, эвазига уларда барча учрашувларни жонли томоша қилиш имконияти бор. Ишонаманки, тез орада стадионларимиз улар учун қайта очилади. Бугун ҳамма тушуниб улгурдики, мухлисларсиз футбол гўштсиз кабобга, гуручсиз ошга ўхшайди", -деб ёзади Имомхўжаев телеграм каналида.