Юртимизга катта футбол қайтди. Уч ойлик танаффусдан кейин Суперлига яна давом эттирилмоқда. Фақат учрашувлар мухлисларсиз ва санитария-гигиена талабларига қатъий амал қилган ҳолда ўтказилмоқда. Биз учун аҳамиятлиси, рестартнинг биринчи ўйини «Бунёдкор» иштирокидаги баҳсга тўғри келди. Катта масъулият талаб қилган мазкур беллашувдан сўнг жамоамизнинг юзи ҳар томонлама ёруғ бўлди. «Бунёдкор» ғалаба қозонди! Белгиланган санитария-гигиена талаблари камчиликсиз бажарилди. Бу ҳақда «Бунёдкор» - «Қўқон-1912» учрашувининг комиссари Сардор Қудратуллаев ҳам ижобий фикр билдирди.

"Уч ойлик танаффусдан кейин пандемия вақтида санитария ва гигиена меъёрлари остида ўтадиган илк ўйинга комиссарлик қилиш каминага юклатилганди. Шу боис табиийки бироз ҳаяжон ва босим бўлди. Бу ҳаяжон ва босим масъулиятдан деб биламан. Зеро, ҳар доим биринчи ўйин муҳим аҳамият касб этган. Босими юқори бўлган. Сабаби, ҳамма биринчи ўйин қандай ўтишини кутади, диққат билан кузатади. Шукр, «Бунёдкор» футбол клуби ўзига юклатилган вазифаларни аъло даражада бажарди. Республика махсус комиссияси қўйган талаблар бўйича «Бунёдкор» жамоаси камчиликка йўл қўйгани йўқ. Бунинг учун клуб раҳбариятига, стадион дирекциясига, масъул ходимларга миннатдорчилик билдираман. Боиси, биринчи учрашув, айтганимдек бу катта масъулият. Қолаверса, баҳс ойнаи жаҳон орқали тўғридан-тўғри эфирда намойиш этилди. Шундай вазиятда «Бунёдкор» футбол клуби барчамизнинг юзимизни ёруғ қилди", — Сардор Қудратуллаев.