100 кунлик танаффусдан сўнг АПЛ ҳам қайтди. «Сити» ўз майдонида «Арсенал»ни таслим этиб «Ливерпул»нинг чемпионлигини кечиктирди.

Лекин бу мавсум чемпионликдан кўра, Чемпионлар лигаси йўлланмалари учун бўлаётган пойга қизиқарлироқ кечмоқда. Агарда «шаҳарликлар»нинг УЕФА томонидан тақиқи туфайли еврокубоклардан четлатилишини ҳам инобатга олсак, бешинчи поғона ҳам ЕЧЛга йўлланма беради. 4 ва 5 поғоналар учун эса чемпионатнинг ярим жамоаси кураш олиб бормоқда.

Бугун айнан мана шу поғоналар учун фаворитлар «Тоттенҳем» ва "Манчестер Юнайтед" клублари тўқнаш келишади. Агарда ўйин 15 март санасида бўлиб ўтганида, шубҳасиз «Юнайтед» фаворит сифатида қараларди. Лекин 3 ойлик танаффус вазиятни ўзгартирди.

Танаффусгача

«Тоттенҳэм» - ЕЧЛдан шармандаларча чиқиб кетди. Англия Кубогида «Норвич»га пенальтилар сериясида енгилди. 6 ўйинлик ғалабасиз серия. Кейн, Сиссоко, Сон ва Бергвейннинг жароҳати.

"Манчестер Юнайтед" - 11 ўйинлик мағлубиятсиз серия. Бруну Фернандешнинг ажойиб спорт формада эканлиги.

Танаффусдан кейин

«Тоттенҳэм» - Моуриньонинг жамоа билан янада яқиндан танишиши ва ўз ғояларини футболчиларга тушинтириши учун вақт пайдо бўлди. Кейн, Сиссоко, Бергвейн ва Сон жароҳатдан тикланди.

"Манчестер Юнайтед" - Погба ва Рэшфорд ҳам тикланишди. Барча муҳим футболчилар майдонга тушишга тайёр.

Нима бизни кутмоқда

Таркиблар борасида ҳолат шубҳасиз яхшиланган. Бироқ футболчилар қай ҳолатда экани номаълум. Буни бугун 00:15да ФУТБОЛ ТВ телеканалида билиб оламиз.

Ҳасан Турдалиев