100 kunlik tanaffusdan so‘ng APL ham qaytdi. «Siti» o‘z maydonida «Arsenal»ni taslim etib «Liverpul»ning chempionligini kechiktirdi.

Lekin bu mavsum chempionlikdan ko‘ra, Chempionlar ligasi yo‘llanmalari uchun bo‘layotgan poyga qiziqarliroq kechmoqda. Agarda «shaharliklar»ning UYEFA tomonidan taqiqi tufayli yevrokuboklardan chetlatilishini ham inobatga olsak, beshinchi pog‘ona ham YECHLga yo‘llanma beradi. 4 va 5 pog‘onalar uchun esa chempionatning yarim jamoasi kurash olib bormoqda.

Bugun aynan mana shu pog‘onalar uchun favoritlar «Tottenhem» va "Manchester Yunayted" klublari to‘qnash kelishadi. Agarda o‘yin 15 mart sanasida bo‘lib o‘tganida, shubhasiz «Yunayted» favorit sifatida qaralardi. Lekin 3 oylik tanaffus vaziyatni o‘zgartirdi.

Tanaffusgacha

«Tottenhem» - YECHLdan sharmandalarcha chiqib ketdi. Angliya Kubogida «Norvich»ga penaltilar seriyasida yengildi. 6 o‘yinlik g‘alabasiz seriya. Keyn, Sissoko, Son va Bergveynning jarohati.

"Manchester Yunayted" - 11 o‘yinlik mag‘lubiyatsiz seriya. Brunu Fernandeshning ajoyib sport formada ekanligi.

Tanaffusdan keyin

«Tottenhem» - Mourinyoning jamoa bilan yanada yaqindan tanishishi va o‘z g‘oyalarini futbolchilarga tushintirishi uchun vaqt paydo bo‘ldi. Keyn, Sissoko, Bergveyn va Son jarohatdan tiklandi.

"Manchester Yunayted" - Pogba va Reshford ham tiklanishdi. Barcha muhim futbolchilar maydonga tushishga tayyor.

Nima bizni kutmoqda

Tarkiblar borasida holat shubhasiz yaxshilangan. Biroq futbolchilar qay holatda ekani noma’lum. Buni bugun 00:15da FUTBOL TV telekanalida bilib olamiz.

Hasan Turdaliyev