Испания чемпионатининг 30-турида "Барселона" клуби сафарда "Севилья" билан тўқнаш келиб, дуранг (0:0) натижа қайд этди.

Натижада жадвалда "кўк-анорранглилар" ва "Реал" ўртасидаги фарқ 3 очкони ташкил қилмоқда. "Мадрид" эртага "Реал Сосьедад" меҳмони бўлади ҳамда Зидан жамоаси ғалаба қозонса, очколар бўйича "Барса" билан тенглашиб олади.

Хўш, очколар тенг бўлиб қолса, қайси жамоа устунликка эга бўлади? Бу ҳақда Ла лига регламентида нима дейилган?

Икки ёки ундан кўп жамоаларнинг очколари тенг бўлиб қолса, уларнинг ўринлари қуйида тамойиллар асосида аниқланади:

1. Ўзаро ўйинларда қўлга киритилган очколар;

2. Ўзаро ўйинлардаги тўплар фарқи;

3. Барча ўйинлардаги тўплар фарқи;

4. Барча ўйинларда урилган голлар сони;

5. "Ҳалол ўйин" қоидаси.

"Барселона" ва "Реал" жамоалари ўртасидаги биринчи даврадаги ўйинда ҳисоб очилмаган бўлса, "Сантьяго Бернабеу"да ўтказилган жавоб учрашувида "Қироллик клуби" 2:0 ҳисобида ғалаба қозонди. Демак, очколар тенг бўлиб қолса, устунлик Зидан жамоаси томонида бўлади.

Шу боис, рестартдан кейин чемпионлик масаласи тақдири каталонияликлар томонида бўлган бўлса, энди у "қаймоқранглилар" томонига ўтиб кетди.