«Барселона» бош мураббийи Кике Сетьен Испания Ла лигасининг 30-тури доирасида бўлиб ўтган «Севилья»га қарши ўйин (0:0) борасида ўз фикрини билдириб ўтди.

— Дастлабки 30 дақиқа умидбахш бўлди. Биз сафарда яхши ўйнадик ва «Севилья»нинг ўзини кўрсатишига йўл қўймадик. Аммо сув ичиш учун берилган танаффусдан кейин биз йўқотишларга йўл қўйиб, темпни тушириб қўйдик.

Иккинчи бўлимда ҳам тўп йўқотилиши давом этди. Биз якдил ҳаракат қила олмадик. Натижада «Севилья» тўпни назорат қила бошлади. Бўш ҳудудга эга бўлган бу жамоа ҳамиша рақибни жазолайди.

«Севилья» дарвозаси олдида хавфли вазиятни қандай қилиб юзага келтиришни билмадик. Чунки кўпчилик бўлиб ҳимояланаётган жамоа жарима майдонига ёриб кириш қийин.

Барча ўйинларда ғалаба қозониш осон бўлмаслигини билардик. Бир очко ҳам — очко.

Ҳа, энди имкониятларимиз аввалгидек эмас, аммо «Реал» ҳали «Сосьедад»ни мағлуб этмади. Бу жамоа билан сафарда ўйнаш осон бўлмайди.

Пессимизмга берилмоқчи эмасман, аммо биз яхши ишларни амалга ошираётганимизни айтишда давом этаман.

– Пике эса пессимистик руҳда фикр билдирди.
– Бу конкрет битта ўйинда муваффақиятсизлик бўлди. Бугун бизда аламли ҳиссиёт ҳукмрон. Чунки ғалаба қозона олмадик.

Дарвозабон жамоада муҳим аҳамиятга эга бўлган ўйинчи. Тер Штеген эса — бизнинг кафолатимиз. Биз рақибнинг ярим майдонида ўйнаб, кўп таваккал қиламиз.