Ўзбекистон Суперлигасининг 6-туридан ўрин олган "Бунёдкор" ҳамда "Локомотив" жамоалари ўртасидаги ўйинда "қалдирғочлар" сафида ёш ҳимоячи Иброҳимҳалил Йўлдошев дебют қилди. Ҳимоячи сайтимиз учун берган интервьюсида дебют учрашуви ҳақида тўхтаиб ўтди.
Маълумот учун, "Бунёдкор" футболчини "Пахтакор"дан мавсум сўнггига қадар ижарага олган.
"Тўғрисини айтаман, умуман кун келиб "Бунёдкор" сафида тўп тепаман деб ўйламаган эдим. "Қалдирғочлар" сафидаги дебют ўйинимни ўтказдим, бундан хурсандман. "Пахтакор"га учралган мағлубиятдан кейин, "Локомотив"га қарши ўйин олдидан жамоага катта маъсулит юклатилган эди. Нима қилиб бўлса ҳам бу ўйинда ғалаба қозонишимиз шарт эди ва буни уддаладик. Биринчи ўйиним бўлгани учун бошида бироз ҳаяжонландим, 15-20 дақиқадан кейин ҳаммаси ўтиб кетди.
"Пахтакор"дан "Бунёдкор"га ўтиши ҳақида
"Бунёдкор" таклифини қабул қилишимда қийинчилик бўлмади. Сабаби мен "Пахтакор" сафида ёшлар лигасида ҳаракат қилаётгандим. Бу ерда эса асосий жамоада ўйнаяпман. Бу мен учун ҳам ,ўйин амалиётига эга бўлаётганим сабабли "Пахтакор"га ҳам фойда бўлади.
Рақиб "Локомотив" ҳақида
"Рақибга тўхталадиган бўлсак, ҳамма билади "Локомотив" Ўзбекистоннинг номдор жамоаларидан бири ҳисобланади. Биринчи бўлимда улар яхшироқ қаршилик кўрсатишди, тенгма-тенг курашлар бўлди. Иккинчи бўлимда эса биз ўйинни кучайтирдик, тўп назоратини қўлга олдик ва бундан фойдаланиб иккинчи голни киритдик. Рақиб сафида захирадан майдонга тушган футболчилар сал бўлса ҳам ўйинни кучайтира олишди деб ўйлайман".
