Биласиз, InStat футбол учрашувлари ҳамда алоҳида футболчиларнинг ўйинлари бўйича чуқурлаштирилган статистик маълумотларни тақдим этадиган жаҳондаги етакчи спорт аналитикаси билан шуғулланувчи компаниялардан бири саналади.
InStat компанияси ўйинларнинг батафсил таҳлили, футболчиларнинг майдондаги ҳаракатлари, уларнинг жисмоний фаоллиги, фойдалилик кўрсаткичлари, майдонда босиб ўтган масофаси-ю рақиб билан яккакурашлардаги устунлиги борасида аналитик материаллар тайёрлайди ва шу билан биргаликда видео анализ амалга ошириб келади.
Мазкур компания жаҳоннинг кўплаб гранд клублари билан биргаликда бир қатор етакчи лигалар билан ҳам ҳамкорлик қилади. Эндиликда Ўзбекистон Профессионал футбол лигаси ҳам InStat билан ўзаро ҳамкорликни йўлга қўйди.
Мазкур ҳамкорлик доирасида Coca Cola Суперлига клублари ўз ўйинлари ҳамда футболчиларининг чуқурлаштирилган статистик маълумотларни бепул тарзда олиш имкониятига эга бўлишади, барча ҳаражатлар ЎзПФЛ томонидан қопланади.
Ҳар бир клубга ўз ўйинининг 60 вароқдан иборат батафсил статистикаси тақдим этилади. Шунингдек, ҳар бир учрашув олдидан клублар бош мураббийлари рақиб жамоанинг сўнгги 3 та ўйини чуқур таҳлили билан танишиб чиқиш имкониятига эга бўлади. Қолаверса, ҳар бир жамоа ва унинг футболчиси ўйини бўйича алоҳида видеокесмалар тур якунига кўра ўша клубга тақдим қилиб борилади.
InStat билан ЎзПФЛ ҳамкорлиги доирасида клубларимиз, шунингдек ўз сафига хорижлик футболчиларни қўшиб олишда ҳам қатор афзалликларга эга бўлади. Яъни клублар InStat Scout видео-платформасига кириб, 5 та хорижий мамлакат чемпионатини кузатиш, уларда ўйнаётган футболчиларнинг ҳаракатлари таҳлили ва видеокесмалари билан танишишлари мумкин бўлади.
Қайд этиш жоиз, футбол учрашувларининг чуқур ва кенг таҳлили юритилиши мураббийлар учун жамоанинг кучли ва бироз оқсаётган жиҳатларини яққол билиб олиш, ҳар бир рақибга нисбатан алоҳида тактика тузиш, ўйинчиларнинг устун ва камчилик жиҳатларини аниқлаш ҳамда уларни бартараф этиш бўйича ишлашда анча наф беради.
