Италия чемпионатининг 32-тури доирасида «Ювентус» ўз майдонида «Аталанта»ни қабул қилиб, мағлубиятдан қутулиб қолди.

Бергамоликлар биринчи бўлимда ҳар томонлама устунлик қилишди ва ҳақли равишда ҳисобда олдинга ўтиб олишди. Баҳснинг 16-дақиқасида Сапата-Гомес бир-бирларини яхши тушуниб ҳаракат қилиши натижасида Дуван жарима майдонига кирди ва аниқ зарба билан ҳисобни очди.

"Ювентус" эса иккинчи бўлимни фаол бошлади ва пенальти ишлади. Дибала узатма берганидан сўнг тўп яқин масофада турган Де Рооннинг қўлига тегди. Криштиану 11 метрли жарима зарбасидан самарали фойдаланди — 1:1.

Голдан кейин устунлик туринликлар томонига ўтди, аммо меҳмонлар бош мураббий ўйин сўнгида ўйинчи алмаштириш орқали ташаббусни яна ўз томонига оғдирди. Натижада баҳснинг 80-дақиқасида Малиновский 15 метрлардан кучли зарба бериб, яна "Аталанта"ни олдинга олиб чиқди.

Учрашувнинг сўнгги дақиқасида эса тўп яна бергамоликлар жарима майдони ичида ҳимоячининг қўлига тегди. Яна пенальти, яна Роналду ва яна гол.

Шу тариқа, "Ювентус" мағлубиятдан қутулиб қолди ва ўз учун муҳим бўлган 1 очкони қўлга киритди. Сарри жамоаси 2-ўриндаги "Лацио" билан фарқни 8 очкога етказди. "Аталанта" эса 2-ўринга кўтарилиб олиш имкониятини қўлдан чиқарди.

Италия А серияси, 32-тур
Ювентус – Аталанта 2:2 (0:1, 2:1)
Голлар: 0:1 – 16 Сапата, 1:1 – 55, пенальти Роналду, 1:2 – 80 Малиновский, 2:2 – 90, пенальти Роналду.
Ювентус – Шченсны, Бонуччи, де Лигт, Данило (Алекс Сандро, 57), Бентанкур, Куадрадо, Рабьо, Матюиди (Рэмзи, 82), Бернардески (Дуглас Коста, 57), Дибала (Игуаин, 69), Роналду.
Аталанта – Голлини, Хатебур, Паломино (Кальдара, 75), Гимшити, Кастань, Гомес (Малиновский, 68), де Рон, Иличич (Пашалич, 58), Фройлер (Тамез, 75), Толои, Сапата (Муриэль, 68).
Огоҳлантиришлар: Бернардески (10), Куадрадо (29), Пашалич (61), Рабьо (73), Хатебур (88).