УЕФА ижроқўми еврокубокларнинг 2019/2020 йилги мавсумида нимчорак финалдан кейин ўйинчилар ҳисобидаги сариқ карточкаларни бекор қилиш ҳақида қарор қабул қилди.

«Чемпионлар лигаси ва Европа лигаси 2019/2020 йилги мавсуми формати ўзгарганидан кейин УЕФА ижроқўми 17 июнь куни чорак финал ва ярим финал босқичини битта ўйиндан иборат қилиб белгилади.

Ўйинлардаги балансни тиклаш мақсадида УЕФА нимчорак финал босқичидан кейин аввалги босқичларда олинган сариқ карточкаларни бекор қилишга қарор қилди. Ушбу мавсумда огоҳлантиришлар чорак финалдан кейин эмас, 1/8 финалдан кейин (яъни финалга 2та ўйин қолганида) "куйиб" кетади. Шу боис, ЕЧЛ ва Европа лигаси регламентларига тегишли ўзгаришлар киритилди. Энди ушбу банд қуйидагича кўринишда бўлади:

«Истисно тариқасида саралаш плей-офф босқичида олинган барча сариқ карточкалар бекор қилинади, улар гуруҳ босқичига ўтмайди. Бундан ташқари, нимчорак финал босқичидан кейин барча сариқ карточкалар "куйиб" кетади ва улар чорак финалга ўтмайди», — дейилади УЕФА расмий сайти орқали эълон қилинган баёнотда.