Нега ФИФА клубларимиздан безор бўлган? Нега футболчилар ЎзПФЛ биносида сарғайиб юради? Чунки айрим клублар билганича иш қилган, футболчилар узоқ йиллар ҳимоясиз қолган.
Энди ЎзПФЛ ва ЎФУ (Ўзбекистон футболчилари уюшмаси) ҳамкорлик қилади. Биз ЎФУни Ўзбекистондаги профессионал футболчиларни бирлаштирувчи ягона вакил сифатида, FIFPro’нинг (Халқаро футболчилар уюшмалари федерацияси) Ўзбекистондаги эксклюзив вакили сифатида тан оламиз.
Тузилган шартномани футболчига бермайдиган клублар бор, бу каби ҳолатларга қарши ишлаймиз. Аёл футболчилар манфаатларини ҳам ҳимоя қиламиз. Уларнинг оддий инсонлар каби оила қуриш, она бўлиш каби ҳуқуқларини ҳимоя қиламиз.
Антидопинг қоидаларини футболчиларга тушунтириб борамиз, келишилган ўйинларга қарши кескин кураш бошлаймиз. Бунинг оқибатларини футболчиларга тушунтириб борамиз.
Суперлига ҳамда миллий терма жамоа футболчиларининг Electronic Arts Sports компанисининг FIFA футбол симулятори ўйинига киритиш ишларини босқичма-босқич амалга оширамиз.
Тез орада ЎзПФЛ қошида футбол клублари вакиллари ҳамда бетараф юридик мақомга эга бўлган шахслар жамланган, ФИФА талабига жавоб берадиган Низоларни ҳал қилиш палатасини тузамиз. Унинг концепциясини ишлаб чиқамиз.
Пандемия даврида футбол мусобақаларини ўтказишдан ташқари, 2021 йилги мавсум учун қадамларни қўйишга ҳаракат қиляпмиз. Олдинда яна яхши янгиликлар бўлади.
Диёр Имомхўжаев
