«Ювентус» клуби кам пул сарфлаб таркибни кучайтириш йўлларини қидиришда давом этмоқда. Журналист Танкреди Палмери тарқатган хабарга кўра, «кекса синьора» ўз ярим ҳимоячиси Дуглас Костани «Арсенал» ҳужумчиси Александр Ляказеттга алмашишни таклиф қилди.

Манбага кўра, туринликлар ушбу рокировкани ҳам Пьянич-Артур алмашуви схемасидан амалга оширишмоқчи. Яъни, футболчиларнинг у клубдан бу клубга ўтиши бир вақтда эълон қилинади, аммо томонлар футболчиларнинг трансфери учун алоҳида-алоҳида пул тўлашади. Гап шундаки, бунда клубнинг харажатлар бир неча мавсумга бўлинади, олинган даромад эса жамоанинг молиявий ҳисоботида дарҳол акс эттирилади. Масалан, Пьяничнинг амалдаги нархи 13 миллион еврони ташкил этган бўлса, клуб уни 60 миллион еврога сотди. Натижада туринликлар молиявий балансида 47 миллион евро фойда юзага келди.

«Арсенал» ҳозирда «Юве»нинг таклифини ўйлаб кўрмоқда. Аммо Костанинг юқори маоши лондонликларни қаноатлантирмаслиги мумкин.

2019/20 мавсумда Ляказетт "канонирлар" сафида барча мусобақалар доирасида 39та ўйинда майдонга тушиб, 12та гол урди ва 7та голга узатма берди. Дуглас Коста эса "Ювентус" сафида 29та ўйинда иштирок этиб, 3та гол ва 7та ассистни амалга оширди.