Coca Cola Суперлиганинг 10-туридан ўрин олган “Сурхон” – “Навбаҳор” (1:1) жамоалари ўртасидаги учрашувдан кейинги матбуот анжуманининг биринчи қисмида “Сурхон” бош мураббийи Равшан Ҳайдаров иштирок этиб, журналистларнинг саволларига жавоб берди. Унинг фикрлари эса қуйидагича бўлди.

"Бугунги ўйин қизиқарли тарзда кечди. Биринчи бўлимнинг 15-20 дақиқаси “Навбаҳор”нинг устунлигида ўтди, кейин эса шогирдларим ўзларига келиб, ўз ўйинларини кўрсатишни бошлашди.

Иккинчи бўлимда умуман бошқача футбол бўлди. Ўйлайманки, бугун 3 очкога лойиқ ўйин кўрсатдик. Омадсизлик туфайли дуранг қайд этдик. Хатолардан хулоса қилиб, кейинги ўйинга тайёргарлик кўрамиз. Дастлабки 20 дақиқа маҳалла футболига ўхшаб кетгани рост. Менимча, бунга пандемия сабабли, юзага катта танаффус, кейин ҳимояда етакчи футболчиларимиз йўқлиги сабаб бўлди. Менимча, Дарко Станоевич бўлганида йигитлар ўйинни хотиржам тарзда ўтказишарди.

Тўғри, ўйин охирида футболчиларда толиқиш бўлди. Захирамиз узун эмас, жароҳат олганлар бор. Ёш футболчиларни майдонга туширишга ҳайиқдим. Тўғри, режа бўйича кетма-кет ўйинларга тайёр бўлишимиз керак. Жароҳат олган футболчилар сафга қайтишларини кутамиз. Афсуски, бугун Александр Касьян тўртинчи сариқ карточкасини олди ва кейинги баҳсда бизга ёрдам бера олмайди.

Бубанья билан деярли ишламадим. Андижонга бориб, 5 дақиқа ўйнаганини ҳисобга олмасак, қайтиб келганидан кейин йўқ бўлиб қолди. Пандемия туфайли карантин бўлди, уйига кетганини эшитдим. Унинг шартномаси қандай эди, тўғриси хабарим йўқ. Шу боис, бу борада бошқа ҳеч нарса айта олмайман.

Жамоа ўйинида хатоликлар ва камчиликлар бор. Келганимдан кейин ўз фалсафамни сингдириб боришга интиляпман. Бу борада ишлаяпмиз.

“Сурхон”да тажрибали футболчилар кўпми? Биласиз, мен жамоага мавсум ярмида келдим, футболчилар менга қадар клубга келишган. Менинг вазифам таркибдаги шу бор футболчилар билан натижа кўрсатиш.

Бугунги ўйин ҳакамларининг ҳаракатларига изоҳ бера олмайман. Уларни назорат қиладиган комиссия бор", — деди Ҳайдаров.

“Навбаҳор” ПФК матбуот хизмати.