Беларусь чемпионатининг 22-тури доирасида «Энергетик-БГУ» клуби ўз майдонида «Смолевичи»ни қабул қилиб, йирик ҳисобда ғалаба қозонди. Ўзбекистонлик ҳужумчи Шаҳбоз Умаров жамоасининг ғалабасига салмоқли ҳисса қўшди.

Учрашувнинг 23-дақиқасида ҳамюртимиз икки ҳимоячини алдаб ўтиб, 14 метрлардан кучли зарба билан дарвозани ишғол қилди. Орадан кўп ўтмасдан Умаровнинг қанотдан етказган узатмасидан сўнг Бакич бош билан дарвозани забт этди.

Иккинчи бўлим бошида Шаҳбоз рақиб жарима майдони ичида дарвозабон билан юзма-юз вазиятда қолди ва берган зарбаси унчалик кучли чиқди. Тўп эса устунга тегиб қайтди ва Мусаханян уни дарвозага жойлаб қўйди.

Баҳс тугашига 12 дақиқа қолганида меҳмонлар битта жавоб тўпини киритишган бўлса, ўйин сўнгида Бакич "Энергетик"нинг тўртинчи голини уриб, ҳисобни йирик кўринишга келтирди — 4:1.

Шу тариқа, "талабалар" бешта ўйиндан иборат ғалабасиз сериядан кейин 3 очкони қўлга киритишди.

Беларусь чемпионати, 22-тур
Энергетик-БГУ – Смолевичи 4:1 (2:0, 2:1)
Голлар: 1:0 – 23 Умаров, 2:0 – 32 Бакич, 3:0 – 53 Мусаханян, 3:1 – 78 Макаров, 4:1 – 89 Бакич.
Энергетик-БГУ – Макавчик, Мавату (Гирс, 77), Юдчиц, Сокол, Свирепа, Бакич (Атеменг, 89), Носко, Совпель, Умаров, Мирошников, Мусаханян (Мухамедов, 76).
Смолевичи – Лазовский, Алибеков (Гурбан, 77), Халимончик, Ращеня, Родионов (Ханкевич, 46), Щегрикович, Макаров, Жигеро (Александрович, 66), Демченко, Жевнеров, Ложкин.
Огоҳлантиришлар: Ложкин (68), Жевнеров (72).