Ўзбекистон миллий терма жамоаси аъзоси Санжар Қодирқулов Тожикистонга қарши ўртоқлик ўйини ҳақида гапирди.
"Ўйинга тайёргарлик, албатта, аъло даражада. Ушбу учрашув ўртоқлик ўйини мақомида бўлгани сабабли ортиқча босим йўқдек кўринар. Бироқ қўшни мамлакат вакилларига қарши баҳс етарлича масъулият юклайди. Бундан ташқари, пандемия сабаб МТЖ ўйинларида узоқ муддатли танаффус юзага келган. Шунинг учун ҳам бу ўйинда ғалаба қозонишимиз жуда ҳам зарур.
ЖЧ-2022 саралаш баҳсларида терма жамоамизнинг кейинги босқичга чиқиш имкониятлари жуда юқори. Асосий вазифамиз бош мураббий кўрсатмаларини бажариб, барча учрашувларда ғалаба қозонишдан иборат. Гуруҳда 1-ўринни эгаллаб, кейинги босқичга чиқиш вазифасини уддалашамизга ишонаман", – деди Қодирқулов.
