Ўзбекистонлик ярим ҳимоячи Жасур Жалолиддинов «Локомотив» сафида норасмий дебютини ўтказди. Россия U-19 терма жамоасига қарши кечган назорат баҳси (1:3) Жасур учун москваликлар жамоасидаги илк ўйин бўлди.

Мазкур ўйиндан кейин «темир йўлчилар» матбуот хизмати Жалолиддиновдан интервью олди.

— «Локомотив»даги биринчи ўйинингга қандай баҳо берасан?

— Қийин бўлди. Жамоага буткул мослашиб кетдим, аммо ҳали формамни тиклашим керак. Ўзбекистон чемпионатида танаффус юзага келганди, кўп вақтда ўйнай олмадим.

— Бу ўйиндаги ҳаракатларингдан кўнглинг тўлдими?

— Йўқ, ҳали юз фоиз тайёр эмасман. Жисмоний томондан тўлиқ тайёр бўлмасанг, ўзингни кўрсатиш қийин кечади.

— Мазкур ўйинда ҳужумнинг барча чизиғида ҳаракат қилдинг. Қай бири қулайроқ?

— Фарқи йўқ — чап, ўнг ёки ҳужум орти.

— Мураббий қандай кўрсатма берди?

— Қанотларда ёрдам бериш ва иккинчи ҳужумчи сифатида ҳаракат қилишимни айтди. Эдерга яқинроқ ўйнадим.

— Жамоанинг ўйинига қандай баҳо берасан?

— Хулосалар чиқариш керак. Исталган мағлубият яхши эмас, сабаби барча баҳслар муҳим. Ёмон ўйнамадик, аммо ўйин унутилади, натижа эса қолади.

— Жамоага мослашиб кетганингни айтдинг. Бунда кимлар ёрдам берди?

— Барча йигитлар — Гильерме, Чорлука. Машғулотдан кейин Алексей Миранчук билан қолиб, жарима зарбалари устида ишлардик. У билан бир ойлик машғулот ичида кўп нарсани ўргандим. Афсуски, у кетиб қолди.

— Миранчук «Аталанта»га кетгач, уни кумирим деб атадинг.

— Ҳа, у менинг кумирим. Болаликдан унинг ўйинини кузатиб келаман ва у каби футболчи бўлишни истаганман. Унда бор қайси жиҳатлар ўзимда йўқлигини биламан. Миранчукка ўхшашга ҳаракат қиламан, аммо унинг ўрнини билинтирмасликнинг иложи йўқ.