"Металлург" – АГМК (1:0) учрашувидан кейинги матбуот анжуманинг иккинчи қисмида мезбонлар бош мураббийи Андрей Шипилов ўз фикрлари билан ўртоқлашди.

— Бугун Тошкент вилояти дербисининг мана шундай қизиқарли, тўқнашувларга бой бўлишини кутгандик. Ҳар икки жамоа муросасиз, қизиқарли ўйин кўрсатди.

АГМК чемпионат етакчиларидан бири ва ҳақли равишда юқори поғоналарда бормоқда. Биз ўз имкониятларимиздан бирини голга айлантира олдик. АГМКда ҳам етарлича вазиятлар бўлди. Бироқ бугун омад биз томонда бўлди.

Бугунги ғалабамизни яқинда вафот этган клубимиз президентининг ёрқин хотирасига бағишлаймиз.

Айни пайтда шифохонада даволанаётган жамоамиз маъмури Равшан Бегматовга соғлиқ тилаймиз ва тезроқ сафга қайтишини кутиб қоламиз.Фурсатдан фойдаланиб, клубимизнинг фидойи шифокорига ва унинг жамоасига ҳам миннатдорчилик билдирамиз.

— Шаҳзод Убайдуллаев ва Дониёр Нарзуллаев нега биринчи бўлимда майдонга тушмади ва захирада қолдирилди?
— Шаҳзод ва Дониёр бутун мавсум давомида танаффуссиз ўйнаб келишди. Дониёр фақат Олмалиқда ўйнамаганди, Шаҳзод эса деярли ҳамма тур ўйинларида тўлиқ қатнашди. Уларни авайлашимиз керак. Бундан ташқари Шаҳзодда кичик жароҳати бор эди.

— "Металлург"нинг кўрсатаётган ўйинларидан келиб чиқиб айтсак, жамоа кучли учликка кира оладими?
— Ҳали олдинда 9-10 тур бор. Келинг, мавсум якунига, декабрь ойигача етиб борайлик. Биз қўлимиздан келганича ҳаракат қилаяпмиз. Бу йўлда астойдил меҳнатдан тўхтамаймиз, ”, - дейди Андрей Шипилов.