Мюнхеннинг "Бавария" клуби фахрий директори Ули Хенесс жамоа ярим ҳимоячиси Тьяго Алькантаранинг келажаги ҳақида фикр билдирди.

"Тьяго билан боғлиқ вазият оддий эмас. Маълум муддат аввал у билан янги шартнома борасида келишиб олгандик. Бироқ, орадан маълум вақт ўтгач, янги чорловларни кўриб чиқмоқчи эканлигини айтди. Бу умуман олганда нормал ҳолат. Ўйлайманки, унинг "Ливерпуль" ёки "Манчестер Юнайтед" клуби билан келишуви бор. Эҳтимол, иккаласи билан ҳам келишиб қўйгандир. Лекин, уларнинг ҳеч қайси бири "Бавария"га ҳозиргача расмий таклиф юборгани йўқ. Улар Тьягони арзонроқ олиш мақсадида, бизни шантаж қилишмоқчи. Ўйлайманки, трансфер ойнаси ёпилгунига қадар, уни катта маблағ эвазига сотиб юборамиз", - Хенесснинг сўзларидан иқтибос келтирмоқда Sport1.