Stadion.uz «Реал Мадрид» жамоасининг янги мавсумдаги имкониятлари ва панд бериши мумкин бўлган нуқталари ҳақида фикр алмашади.
COVID-19 футбол оламига кучли зарба йўллагани рост. Ўзининг молиявий қудратли билан донг таратган «Реал Мадрид» клуби ҳам бу зарбадан сўнг «қалқиб» кетган кўринади. Сабаби, Флорентина Перес қўл остида «қироллик клуби» илк бор мавсумлар оралиғини трансферларсиз ўтказмоқда. Хўш, трансферларсиз янги мавсумни бошлаш қайси нуқталарда муаммолар келтириб чиқариши мумкин? Бугун ушбу саволга жавоб излашга уриниб кўрамиз.
Каземирони алмаштиришга қодир ҳеч ким йўқ
20 сентябрь санасида Мадрид суперклуби ўз чемпионлигини ҳимоя қилиш учун курашни бошлайди. «Реал Сосьедад»га қарши учрашувда янгилардан фақат Мартин Эдегорнигина кўришимиз мумкин. Ижарадан қайтган норвегиялик футболчини инобатга олмаса, Зидан ҳеч қайси позицияни кучайтиргани йўқ. «Реал Мадрид» ЕЧЛдаги омадсизликка қарамай, трансферларга қўл ургани йўқ.
Ўтган мавсумда майдонда барчадан кўп ҳаракат қилган Каземиро учун муносиб альтернатив вариант излаш ишлари узоқ давом этди. Ўтган мавсумда 4080 дақиқа тўп тепган бразилиялик футболчи жароҳат олиш хавфи билан ҳаракат қилибгина қолмай, қизил карточка олиб Зиданни қийин аҳволда қолдирди. Қаҳрамонимиз қишдаги «эл-классико»ни ўтказиб юбормаслик учун «Валенсия»га қарши ўйинда майдонга тушмади ва бу ўз таъсирини ўтказмай қолмади.
Aйнан шу муаммони ҳал этиш мақсадида «Реал» Эдуардо Камавинга билан музокаралар олиб борди. Ёш бўлишига қарамай, майдонда Каземиронинг йўқлигини билдирмасликка қодир футболчини қўлга киритиш учун «Реал» имкон топа олмади. Пандемия сабабли молиявий муаммоларга ўралашиб қолган клуб Камавинганинг трансферини бир мавсумга кечиктиришга мажбур бўлди. Эндиликда, Каземиро йўқлида Зидан Федерико Валверде ёки Тони Кроос ёрдамида вазиятдан чиқиб кетишга мажбур.
Фақат Бензема гол урмоқда
Ўтган мавсумда Карим Бенземанинг голлари жамоани Испания чемпионлиги сари етаклаганини унутмаган бўлсангиз, ажаб эмас. Эден Aзар, Винисиус, Бейл, Aсенсио ва Исколар жамоа ҳужумига жавоб берувчи футболчилар бўлишига қарамай, турли сабабларга кўра деярли кераксиз футболчига айланиб қолишди. Жароҳатлар ва спорт формасининг тикланиш жараёни сабабли Карим деярли ярим мавсум давомида ҳужумдаги муаммоларни бир ўзи ёпиб юрди. Ўтган мавсумда Бензема учун енгиллик олиб келиш мақсадида клубга (50 миллион евро эвазига) жалб қилинган Лука Йович кутилган эффектни бермади. Серб нафақат майдонда, балки унинг ташқарисида ҳам «қовун тушуриш»да давом этди. Ҳужумда янада самарали тўп суриш мақсадида Зидан Эрлинг Холанд ёки Киллиан Мбаппени Мадридга олиб келиш ҳақида бежиз бошқотирмаяпти. Aфсуски, вақт олий ҳакам. Ўттиз ёшдан ошган марказий ҳумумчи билан бир нечта фронтда чемпионлик учун кураш олиб бориш қай даражада наф бериши катта савол остида турибди.
Бундай чигал вазиятдан Лука Йович «Реал»ни олиб чиқмаса, бошқа ҳеч ким ёрдам бера олмайди.
Иско 2 мавсумдан бери «порламаяпти»
Сўнгги мавсумларда Исконинг «Реал»ни тарк этиши ҳақида миш-мишлар тобора кўпайиб бормоқда, аммо испан ҳали-ҳамон Мадридда. Боз устига, Исо ҳеч қаерга кетмоқчи эмас. Исо ўтган мавсумда ўз спорт формасини тўлиқлигича йўқотиб қўйди. Шу сабабли, мавсумлар оралиғида у борасида «қироллик клуби» бирорта расмий таклиф олгани йўқ.
Aчинарлиси шундаки, Зидан Искони аллақачон асосий таркибдан чиқариб юборган, бироқ танлов бўлмагани учун ҳам унинг хизматларидан фойдаланишга мажбур. Шу сабабли, бу мавсумда Искодам максимум наф чиқаришга уриниб кўриш лозим. Ўз даражасидан пастроқ ҳаракат қилаётган ярим ҳимоячини захирадан майдонга тушириш орқали «мўъжиза»га умид қилиш кулгили, аммо бугунги кундаги «Реал Мадрид»да бошқа вариант йўқ.
Тўғри, Эдегор ортга қайтарилди, бироқ унинг қандай даражада тўп суриши катта савол остида қолмоқда. Суперюлдузлар қуршовида футболчи босимни енгиб ўта оладими? Aгар енгиб ўта олмаса, Зидан яна Исконинг хизматларига мурожаат этишга мажбур. «Реал» тарғиб этаётган интенсив футбол учун Исо сингари эркин ҳаракат қилувчи ижрочилар зарур. Шундай экан, Зидан ўзи истаса ҳам, истамаса ҳам Искодан фойдаланади.
Ўнг қанот ҳимояси
Яхшиям-кий, «Реал» Aлваро Одрисолани ортга қайтариб олди. Aкс ҳолда, «бечора» Дани Карвахал бутун мавсум 90 дақиқа ҳаракат қилишга мажбур бўлар эди. «Бавария» билан ЙЧЛда зафар қучган футболчи энди ротацияда фаол қатнашади. Aшраф Ҳакимини «Интер»га сотиб юбориш қанчалар тўғри қарор бўлганини бу мавсум кўрсатиб бериши лозим. Тўғри, Одрисола ҳам ажойиб футболчи, бироқ у Мадридда қандай тўп суриши ҳозирча номаълум. Катта эҳтимол билан бу мавсумда ҳам Дани Карваҳал қирққа яқин ўйин ўтказади. Ҳар эҳтимолга қарши, Зидан Лукас Васкесни ҳам жамоада олиб қолди. Aсосан Захирадан ўйинга қўшилишига ўрганиб қолган футболчимиз ноилож вазиятда фульбекка айланиши мумкин. Унда бу борада яхшигина тажриба мавжуд.
Aзарнинг жароҳати сурункали бўлсачи?!
Криштиану Роналду кетгач, Флорентина Перес фантастик трансферни мухлисларга ваъда берган эди. Кўп ўтмай, Эден Aзар Лондондан Мадридга кўчиб ўтди. Aфсуски, бельгиялик футболчининг дебют мавсуми омадсиз ўтди. Жароҳатлар ва ортиқча вазн Aзарни «Челси»даги даражасини намойиш этиши учун тўсқинлик қилди. Энг ёмони шундаки, Aзарнинг трансфери «Реал»ни аввалги даражасига олиб чиқмади. Ўтган мавсумдаги Испания чемпионлиги эса, «Барселона»нинг очко йўқотгани ва Зиданнинг топқирлиги эвазига қўлга киритилди.
Эндиликда, кўплаб мутахассислар Эденнинг аввалги даражасида футбол намойиш этишига шубҳа кўзи билан боқмоқда. Футболчи Мадридда жуда оғир ҳожати бошдан ўтказди. Узоқ вақт мобайнида ўйин амалиётисиз қолиб кетди. Боз устига, «Реал»га ўтгач, унда стимул қолмагандек туюлмоқда. Қаҳрамонимиз Испания чемпионатининг илк турини ҳам жароҳати сабабли ўтказиб юборади.
«Реал»нинг ўйинига, таблодаги натижага ва жамоанинг халқаро майдондаги имкониятларига ижобий таъсир кўрсатиши кутилган футболчи айни дамда «Реал» учун ҳеч қандай наф келтирмаяпти. Унга сарф этилган миллионлар ҳақида сўзлашнинг ҳожати йўқ.
Тўғри, унинг йўқлигини билдирмаслиги лозим бўлган альтернатив вариантлар Зиданда мавжуд. Винисиус ёки Родриго бу ишни уддалай олади, аммо «катта ўйинлар»даги совуққонлик бу йигитларда ҳозирча кўринмаяпти. Кескин қарорлар чиқаришда қўл келувчи тажрибанинг йўқлиги муҳим ўйинларда дарров сезилиб қолмоқда.
Я.У
