"Шаҳр Ҳодро" билан баҳсдан сўнг ўйиннинг энг яхши футболчиси деб топилган "Пахтакор" вингери Жалолиддин Машарипов матбуот анжуманида иштирок этди.
- Ўз имкониятимнинг 70 фоизи даражасида ўйнадим деб ҳисоблайман. Бу турнирда анча қийинроқ беллашувларни ҳам ўтказганмиз. Аввалги уч учрашувда юта олмаганимиз сабабли бугун ютишимиз керак эди. Вазиятлардан фойдаланишда бу сал халал берди. "Ҳилол" ҳақида умуман ўйламадик. Йигитлар билан гаплашиб, бор кучимизни бериш ҳақида бир-биримизга айтгандик. Гуруҳда яхши ўйин кўрсата олдик. Мусобақада узоқроққа етиб боришни истаймиз.
Ҳар ўйиндан сўнг жамоада йигитлар билан баҳсни таҳлил қилиб чиқамиз. Қандай ўйнадик, хатолар, яхши жиҳатлар хусусида суҳбатлашамиз. Чемпионлар Лигасида жуда кўп вазиятлар бўлмайди, бунда 2-3 имкониятдан гол уриб кетиш керак. Биз камчиликларимизга барҳам бериш устида ишлаймиз. Ўзимга келсак, 2-3 нафар рақиб жуда яқин ўйнамоқда. Мураббийлар менга имкон бўлиши билан рақибларни алдашга ҳаракат қилишим ҳақида айтишади, албатта. Навбатдаги беллашувларда янада кўпроқ уриниб, жамоага фойда келтиришга уринаман.
