Coca Cola Суперлига 18-туридан ўрин олган “Бухоро” – “Навбаҳор” (0:0) жамоалари ўртасидаги учрашувдан кейинги матбуот анжуманининг иккинчи қисмида “Бухоро” бош мураббийи Жамшид Саидов иштирок этиб, журналистларнинг саволларига жавоб берди.
- Биринчи галда устоз ва мураббийларни байрам билан табриклайман. Уларга соғлик ва саломатлик тилайман. Учрашув ҳақида нима дейишим мумкин? Доимгидек оғир ўйин бўлди. Мазкур учрашувга яхши тайёргарлик кўрган эдик. “Навбаҳор”нинг қандай кучга эга жамоа эканлиги маълум эди. Албатта, ўйин давомида тактик ва техник хатолар бўлди. Шундай бўлса-да, шогирдларимга ажойиб ўйин ва ғалабага бўлган хоҳиш учун раҳмат айтмоқчиман.
Бугун жамоамизда уч нафар футболчи Суперлигадаги дебютини ўтказди. Биз ҳар бир учрашувга охирги ўйинга чиққандек муносабатда бўляпмиз. Турнир жадвали барчасини айтиб турибди. Биринчи бўлимда Жасур Ҳакимов жароҳат олди. Шу боис уни алмаштирдим. Шу сабабли, уларнинг ўрнига ёшларни туширишга мажбур бўлдик. Ҳа, режамиз ҳимояга эътибор берган ҳолда қарши ҳужумлардан фойдаланиш эди. Биринчи бўлимда режамиз иш бермади. Иккинчи бўлимда эса вазиятларга эга бўлдик.