«Арсенал» мураббийлар штаби ярим ҳимоячи Месут Ўзилни Европа лигаси мусобақасининг 2020/2021 йилги мавсуми учун қайдномага киритмоқчи эмас. Бу ҳақда "Football London" нашри журналисти Жеймс Бенж хабар тарқатди.

Шунингдек, манбага кўра, ҳимоячи Сократис Папастатопулос "канонирлар" қайдномасидан ўрин олмайди. «Арсенал» эса тез орада қайдномага киритилган футболчилар рўйхатини эълон қилади.

31 ёшли Ўзил сўнгги марта март ойида майдонга тушган эди. 32 ёшли Папастатопулос ҳам мавсумнинг дастлабки қисмини ўтказиб юборди. Ўтган мавсумда у АПЛнинг 19та учрашувида майдонга тушиб, 2та гол урди ва 6та сариқ карточка ишлади.

«Арсенал» Европа лигасида «Рапид», «Мольде» ва «Дандолк» билан бир гуруҳдан ўрин олган.