Криштиану Роналду коронавирусга чалингани ҳақида хабар пайдо бўлиши билан "Ювентус" молиявий жиҳатдан зарар кўра бошлади. Туринликларнинг акциялари нархи арзонлашди, дея хабар тарқатди "Football Italia" нашри.
Манбага кўра, "Юве" акцияларининг нархи 6,9 фоизга арзонлашган. Орадан бироз вақт ўтиб эса арзонлашиш сурати пасайган — 2,64%.
Эслатиб ўтамиз, 35 ёшли Роналду Португалия терма жамоа сафида коронавирусга чалинди. Шу боис, у Швецияга қарши бўладиган Миллатлар лигаси баҳсида терма жамоага ёрдам бера олмайди. Шунингдек, у "Ювентус" таркибида "Кротоне" ва "Верона"га қарши А серия, шунингдек, Киевнинг "Динамо" клубига қарши Чемпионлар лигаси баҳсларини ўтказиб юборади.