Андрей Канчельскис LinkedIn'даги ўзининг саҳифаси орқали "Навбаҳор" бош мураббийи лавозимини тарк этганини эълон қилди. Россиялик мутахассис клуб раҳбарияти ва мухлисларга миннатдорчилик билдириб, уларга омад тилади.

"Менинг "Навбаҳор"даги фаолиятим якунига етганидан афсусдаман. Мавсумни ушбу жамоа сафида якунлаб, қандай натижага эришганимизни кўрмоқчи эдим. Аммо ҳамиша ҳам вазият сен истагандек бўлавермайди.

Шунга қарамай, мен "Навбаҳор" раҳбарияти, клуб ходимлари ва ўйинчиларга менга Ўзбекистонда унутилмас лаҳзаларни тақдим этишгани учун миннатдорчилик билдираман. Мен клуб бошқарувида 2та даврни ўтказдим. Ҳаммага келажакда омад тилайман.

Албатта, мухлисларга ҳам катта раҳмат айтаман. Улар фаолиятим давомида мен дуч келган энг жўшқин ишқибозлар ҳисобланади. Улар мени қўллаб-қувватлашди ва жамоанинг ростмана 12-ўйинчиси бўла олишди. Умид қиламан, тез орада сизлар "Навбаҳор" стадионда жонли қўллаб-қувватлаш имкониятига эга бўласиз. Яна умид қиламанки, сиз бу жамоадан фахрланасиз.

Мен эса мураббийлик фаолиятимдаги янги синовларни интизорлик билан кутаман", — дея ёзди Канчельскис.