VAR тизимини Ўзбекистонда жорий этиш ва ўзбекистонлик мутахассиларга ушбу тизимни ўқитиш бўйича жорий йилда бир қатор ўқув-амалий семинарлар ташкил этилмоқда.
Футбол мутахассисларини тайёрлаш марказида видео ёрдамчи ҳакамлар (Video Assistant Referee) тайёрлаш бўйича навбатдаги назарий-амалий семинар бўлиб ўтмоқда.
Кеча бўлиб ўтган майдондаги машғулотларда, семинар қатнашчилари ФИФА 2020 VAR симуляторидан фойдаланган ҳолда долзарб мавзуларда, хусусан жарима майдончасидаги қоида бузишлар, офсайд, тактик қоида бузарликлар бўйича ўз малакаларини оширди.
Бундан ташқари, уларга VAR қайси ҳолатда ҳакамлик жараёнига бевосита таъсирини ўтказа олиши, бош ҳакамга такрорий вазиятни томоша қилишни маслаҳат бериши ёки нотўғри қилинган қарор ҳақида хабардор этиши бўйича тавсиялар берилди.
Ҳакамларимиз VAR кўникмаларини тўлиқ ўзлаштиришлари учун яна бир қанча назарий ва амалий машғулотлар ташкил этилиши режалаштирилган. Семинарни ФИФА инструктори - Фарҳод Абдуллаев олиб бормоқда.
