"Реал" бош мураббийи Зайниддин Зидан "Кадис"га қарши ўйиндан кейин якшанба куни машғулот ўтказди. Шундан сўнг франциялик мутахассис шанба кунги баҳсда ўйинчиларга нима етишмаганини тушунтирди.

Мураббийнинг фикрича, "Кадис"га қарши ўйинда футболчиларга интенсивлик ва учрашувга бўлган муносабат етишмаган. Бундай ҳаракат билан майдонга чиқиш мумкин эмаслигини Зидан алоҳида таъкидлади ва жамоани огоҳлантирди.

Мутахассис ҳеч бир футболчига алоҳида тўхталмади. Зидан ўйинчилардан жанговарлик ва якдиллик руҳиятини сақлаб қолишга чақирди.

Суҳбат давомида Серхио Рамос, Тони Кроос ва Лука Модрич каби етакчи ўйинчилар сўзга чиқиб, жамоадошларидан кейинги баҳсларда интенсивлик ва якдилликни сақлаб қолишни сўрашди.

Жамоа ва Зидан ўртасидаги муносабат нормал ҳолатда қолмоқда. Чунки, ўйинчилар "Кадис"га қарши ўйиндаги ўз айбларини ҳис қилишди. Жамоа "Шахтёр"га қарши баҳсда энг яхши ўйинни намойиш этишга келишиб олишди.